CEBU, Philippines - Wala masurpresa si Cebu City Councilor Christopher Alix nga misaka ang gidaghanon sa mga pasyente nga gidala sa Cebu City Medical Center (CCMC).
Kini bisan pa man kung ang ubang gimbuhaton sa maong tambalanan gitugyan na ngadto sa nagkadaiyang barangay health center sa siyudad.
Partikular nga misaka ang admittances mao ang Pediatrics Ward diin kasagaran sa mga pasyente mao ang mga biktima sa sakit nga dengue.
Matud pa ni Alix nga dili na ikaalarma ang pagsaka sa na-admit sa CCMC tungod kay libre ang serbisyo niini ilabi na niadtong gipanghilantan.
Gawas niini miingon ang konsehal nga panahon na usab karon sa ting-uwan nga maoy tingsaka sa mga kaso sa dengue sa dakbayan.
“Dili na ta ana angayang mahibulong kay karon man gong panahona nga ting-uwan mudaghan gyud nang kaso sa dengue,” sumala ni Alix.
Ang konsehal nga maoy chairman sa Committee on Health and Hospital Services sa City Council subli na hinuong mipahimangno sa mga doktor sa CCMC.
“Atimanon lang gyud ang mga pasyente nga gisuspetsahan nga nataptan og dengue para matabang dayon,” nagkanayon si Alix.
Sa samang higayon gipahinumduman usab sa konsehal ang mga molupyo sa siyudad nga regular nga manglimpyo sa ilang panimalay.
Partikular na ang pagpaaso matag hapon ug pagyabo sa napundong tubig nga posibleng mahimong breeding site sa mga lamok nga nagdala sa dengue.
Nasayran nga mag-ipon na lang sa usa ka hospital bed ang pipila ka biktima sa dengue nga nalandig sa maong tambalanan tungod sa nagkadaghang pasyente.
Kini tungod kay giingong dili usab kabalibaran ang mga suspected dengue victims sa dakbayan nga magpa-admit diha sa CCMC. (BANAT NEWS)