Bana sa broker sa Balili deal mitingog gyud

CEBU, Philippines - Nagdumili sa pagkompirmar ug wala sad mohimakak nga nakadawat og komisyon ang asawa ni Atty. Lorito Durano nga bana sa giingong broker sa nakontrobersyal Balili deal sa Kapitolyo.

Si Durano nga mao sad ang dean sa College of Law sa University of Southern Philippines nagkanayon nga di siya mokumpirmar ug wala sad mohimakak nga nakadawat og kapin sa P4 milyones nga commission ang iyang asawang si Lumen Durano.

Matud pa ni Durano dihang gihinabi sa DyRF nga wala gyud siya makakita ug wala usab mipahibawo kaniya ang iyang asawang si Lumen nga nakadawat kini og P4 milyones nga commission sa gi-ahentihang lote.

Gipahibalo ni Durano nga ang iyang nahibaw-an sa pagkamatay na sa iyang asawa dili ang kita niini kundili ang kadaghanon sa liabilities.

 Apan gitataw ni Durano nga may lain-lain silang accounts ug dili usab siya manghilabot sa kinitaan sa iyang asawa ilabina sa iyang profession sa pagka-lisensiyadong broker.

Si Durano miklaro hinuon nga sukad sa pagpuyo nila sa iyang asawa kapin na sa 40 ka tuig, wala gyud siya mosulay sa pagtan-aw sa bank accounts niini bisan pa gani og kini namatay na.

Hinuon gitumbok ni Durano nga andam siyang pabuksan ang bank account sa iyang asawa kun gikinahanglanon sa imbestigasyon sa kapitolyo o ba kaha sa Ombudsman.

Dugang ni Durano nga andam usab siyang motambong sa bisan unsang imbestigasyon sa mga sakop sa Hunta Probinsiyal aron maklaro ang habig sa iyang asawa apan dili siya makapasalig kun makahatag siya sa tanang gikinahanglanong impormasyon. (Chester Abadilla)   (BANAT NEWS)