Ulitawo patay kay liog gitigbas sanggot

CEBU, Philippines - Patay ang usa ka ulitawo human gisanggot ang iyang liog sa iya rang uyoan niadtong Domingo sa alas 10:00 sa gabii sa barangay Minolos lungsod sa Barili.

Ang biktima giila sa kapulisan nga si Jonel Enriquez 19, nagpuyo sa nahisgutang lugar ug dead-on-arrival sa Vicente Sotto Memorial Medical Center (VSMMC) samtang ang suspetsado mao si Ramon Mahilom 37, mag-uuma bana sa iyang iyaan.

Si PO2 Hector Veloso sa Barili Police Station nga gikahinabi sa Banat News nagkanayon nga padulong nang mipauli ang biktimang si Enriquez sa ilang panimlay nga naglakaw sa dalan dihang giatangan sa iyang uyoan ug gitigbas ang liog sa gidalang sangot.

Human sa krimen nadakpan gilayon sa kapulisan ang suspetsado, samtang ang biktima gidali pagdala sa Barili District Hospital Hospital, apan gumikan sa grabeng samad tinigbasan diha sa iyang liog gibalhin gilayon sa VSMMC apan gideklarar sa mga doctor nga DOA.

Matud pa ni PO2 Veloso nga hubog ang suspetsado dihang iyang nahimo ang krimen gumikan sa kalagot niini nga ang biktima maoy gipasanginlan niining maoy nikawat sa iyang cellphone apan wala lang gyud siyay ebidensya sa pasangil.

Hinungdan nga niadtong nilabay’ng gabi nakahukom siya nga patyon nalang niini ang biktima tungod kay human gipasanginlang maoy nagkawat sa iyang cellphone giingong nasuko kini kaniya ug nagtubag-tubag pa.

“Estorya sa suspetsado nga nagkabingkil na sila niadto pang nilabay’ng bulan tungod kay nagtuo siyang kini maoy nikuha sa iyang cellphone. Unya nagsuko-suko ug magtubag-tubag man daw maong iyang gi-atngan ug gitigbas,” sumala pa ni PO2 Veloso.

Kasong murder maoy gihikay na sa kapulisan sa lungsod sa Barili nga ilang ipasaka batok sa akusado kinsa gitangong na sa karsel sa kapulisan. (Guam Logroño)   (BANAT NEWS)