Election ban sa blocktimers may dautang reaksyon

CEBU, Philippines - Gikondinar sa pipila ka mga magsisibya sa Sugbo ang lakang sa Commission on Elections pag-ban sa tanang mga radio blocktimers nga makasibya atol sa nagsingabot nga 2010 election.

Si Provincial Comelec Supervisor Atty. Lionel Marco Castiliano maoy mipahibawo niini atol sa pagpakigtagbo sa mga sakop sa Cebu Citizens Press Council niadtong Sabado.

Si Castillano mipadayag nga tumong niini aron wala nay mahitabong election related violence sa mga politiko ilabi na sa mga binayrang sibya sa mga blocktimers pabor ug dili sa usa ka politiko.

Apan ni Engr. Greg Senining kanhi presidente sa Cebu Association of Media Practitioner (CAMP) ug nahimo na usab nga blocktimer sulod sa 20 na ka tuig miingon nga dili makiangayon ang maong lakang tungod kay nakalapas kini sa probisyon sa press freedom.

Gihulagway ni Senining nga usa ka iresponsable nga lakang ang maong gilaraw sa Comelec gumikan kay alang niya igo na ang mga existing nga balaod karon sama sa libel laws nga magpahamtang og silot niadtong mga magsisibya ilabi na sa mga blocktimers nga makalapas sa lagda sa panibya.

Si ANAD partylist Representative Pastor “Jun” Alcover apil usab sa mikondinar sa maong lakang ug mipadayag nga kalapasan sa Konstitusyon ang maong nahuna-hunaang lakang sa Comelec.

Dugang pa niya nga wala magpasabot nga silang tanang mga radio blocktimers mga dautan ug ang tanang mga station produced anchor mao lay mga tarong. Si Alcover ug Senining pabor hinuon nga i-regulate lang ang mga blocktime program sa tanang estasyonan sa radyo kay sa ipatuman ang plano niining hingpit nga pag-ban.   (Darrel Carumba)    (BANAT NEWS)