CEBU, Philippines - Nalumos ug namatay ang usa ka 57-anyos nga lalaki human kini matagak sa dike sa dagat samtang mitubag sa sugo sa iyang lawas niadtong miaging Biyernes sa gabii sa barangay Looc, lungsod sa Dumanjug. Ang namatay giila sa kapulisan nga si Roque Teroso, minyo, nagpuyo sa nahisgutang lugar kinsa nakit-an nalang sa ilang mga silingan nga wala nay panimuot diha sa dagat.
Sa report sa kapolisan sa Dumanjug diha sa Operation Branch sa Cebu Provincial Police Office ang mga silingan sa biktimang si Teroso, gikatahong nakit-an pa kini niadtong Biyernes sa alas-5 sa hapon nga naglakaw sa sementadong dike.
Giingong hubog ang biktima niadtong tungura ug paglabay sa 45 minutos nakit-an nalang sa mga residente sa dapit nga naghayang sa baybayon ug gituuhang nahagbong ug mitugpa sa mga batuong bahin sa ubos hinungdan nga nawad-an sa panimuot.
Sumala pa sa mga residente sa lugar nga ang biktimang si Teroso ilang nakit-ang daw mitubag sa sugo sa iyang lawas ug aksidente kining nahagbong.
Ang biktima nakaangkon og samad sa iyang nawong ug gidali pagdala sa iyang mga silingan sa Barili District Hospital apan gideklarar sa mga doktor nga patay na. Ang kapulisan sa nahisgutang lungsod ang nisugyot ngadto sa pamilya sa namatay nga ipaubos kini sa autopsy aron pagtino kun unsay namatyan niini. – BANAT NEWS