Inquiry sa Balili fiasco ok ni Tony

CEBU, Philippines - Suportahan ni Cebu City South District congressman Antonio Cuenco nga ipahigayon ang congressional inquiry labot sa kontrobersiyal nga pagpalit sa Kapitolyo og lote sa lungsod sa Naga nga nalubog sa dagat.

 Kini kun ang katuyoan sa maong inquiry mao ang pag-usab sa land registration procedures.

 Matud pa ni Cuenco sa interbiyu sa DyRF nga daghan na siyang nadawat nga reklamo gikan sa iyang mga konstituwente ug mga higala batok sa mga opisyal ug mga kawani sa register of deeds.

 Si Cuenco nagkanayon nga sigon sa reklamo daghang mga lote nga bisan dili angayan nga titulohan tungod kay nakonsiderar nga public domain apan makalusot pa gihapon.

 Matud pa ni Cuenco nga ang iyang pagsuporta sa maong congressional inquiry dili mao ang paggukod kun si kinsa ang nakakwarta ug nalambigit nga opisyal sa Kapitolyo sa “Balili fiasco” kun dili ang pag-ila sa tawo sa register of deeds nga naghimo sa binuang nga transaksyon.

 Dugang pa ni Cuenco nga angayan usab nga ma-review ug usbon ang registration system sa titulo sa yuta kay puno kini sa daghang buslot. - Chester Abadilla (BANAT NEWS)