National Heroes Day karon, walay klase ug trabaho
CEBU, Philippines - Walay trabaho ug labaw nang walay klase karong adlawa sa tibuok kapupud-an subay usab sa pagsaulog sa nasud sa National Heroes Day.
Ang kasaulugan himuon unta sa matag katapusang Domingo sa buwan sa Agosto apan kini giirog tungod sa Akta Republika 9492.
Nalatid sa maong balaod ang pagbalhin sa mga holidays sa nasud ngadto na sa labing duol nga adlaw'ng Lunes gawas lang sa mga relihiyosong kasaulugan.
Ang National Heroes Day nagtimaan sa pag-alsa sa bayaning si Andres Bonifacio ug kaubanan batok sa Spanish government dinhi sa Pilipinas.
Kini niresulta sa pagkatukod sa (KKK) kon Kataas-taasan, Kagalang-galangang Katipunan ng mga Anak ng Bayan o Katipunan.
Wala na maantos sa grupo ni Bonifacio nga magpabiling ulipon ang mga Pilipino sa mga Katsila hinungdan nga sila nangita sa ilang kagawasan.
Ang chairman sa Committee on Cultural and Historical Affairs sa City Council nga si Konsehal Arsenio Pacaña niingon nga angayan lang saulugon ang adlaw sa mga bayani.
Kini aron dili usab makalimtan ang pag-ula og dugo sa mga katiguwangan nga maangkon pag-usab ang ilang gimithi nga kagawasan.
“Kay ang mga batan-on malimot baya nga ang freedom nato karon nga na-enjoy bunga kana sa kahago ug pag-ula og dugo sa mga tawo niadto,” sumala ni Pacaña.
“Ang essence sa celebration nato is to remember the people who have shed blood and who have done more than the ordinary things para sa atong nasod,” dugang sa konsehal.
Nasayran nga ang kagamhanan sa dakbayan niadto pang miaging Agosto 27 nagsugod pagsaulog sa National Heroes Day. – BANAT NEWS
- Latest
- Trending
