Jonas sad-an

CEBU, Philippines - Napamatud-ang sad-an sa Office of the President si Mandaue City Mayor Jonas Cortes   tungod sa pagdumili niini pag-implementar sa napanday nga ordinansa sa Konseho niadtong Disyembre 27, 2007.

Si Cortes gikasuhan og administratiba sa sakop sa Konseho nga sila si Konsehal Victor Biaño, Alfonso Albaño,Jr. Ma. Noeleen Borbajo, Procopio Villanueva, Editha Cabahug ug Emiliano Rosal tungod sa dishonesty, oppression, misconduct in office, abuse of authority ug culpable violation of the constitution tungod sa wala niini pagsunod sa City Ordinance No. 11-2007-428.

Base sa mga panghitabo kabahin sa maong reklamo giingong kini nagsumikad sa ordinansang gitituluhan og “Approving the annual budget and the annual investment plan, as revised, appropriating the total amount of six hundred sixty-eight million pesos (Php688,000,000.00) to meet necessary expenditures of the city government of Mandaue for the calendar year 2008.”

Sa dihang naabot sa buhatan sa mayor niadtong Enero 24,2008, gi-veto kini sa mayor partikular na ang line items, section 2 ug section 3 sa rason nga kini mga gipasupot lang, ang rason sa mayor gibase sa legal opinion sa City Legal Office.

Tungod niini, ang konseho mi-override sa veto power sa mayor pinaagi sa resolusyon nga No. 11-103-2008.

Ang maong aksyon sa konseho miresulta kaniadto sa tinubagay sa executive department pinanguluhan ni Cortes ug legislative pinanguluhan ni Bise Mayor Carlo Pontico Fortuna.

Niadtong Mayo 12,2008, misang-at og reklamo ang Konseho sa Malacañang ug kini gitubag usab ni Cortes ug mipasaka usab og kaugalingong countercharge diha sa Department of the Interior and Local Government.

Sa iyang tubag ug countercharge, si Cortes miklarong igo ra siyang nibase sa legal opinion sa City legal officer kabahin sa probisyon sa Section 77 sa RA 7160, mipasabot si Cortes nga di niya intensyon nga pakauwawan ang mga sakop sa Konseho. Sa reklamo sa Konseho, giingong gipanghinganlan sila og “maayong laki” ug “ngilngig” sa mayor, apan ang naulahi mipasabot nga di kini pagbiay-biay sa ilang pagkatawo kundili pagdayeg ug pag-ila pa gani sa ilang abilidad.

Samtang kabahin sa Section 2 sa gihisgutang ordinansa, giklaro ni Cortes nga tungod kay kadudahan man ang pagkabutang niini angayan lang nga di kini ipatuman ug angayan manubag niini ang Konseho, sanglit mismong ang Department of Budget Management mipagawas og memorandum nga nagdeklarar sa section 2 ug section sa maong ordinansa nga kini “inoperative.”

Human sa makuting husay sa maong kaso, ang Office of the President (OP) mipakawalay sala kang Cortes sa kasong dishonesty, oppression, grave misconduct, abuse of authority and culpable violation of the Constitution tungod kay ang gibuhat sa mayor gituuhang walay malisya ug gikonsiderar nga tinarong. Apan gumikan sa wala niini pagsunod o pagpatuman sa gilatid nga probisyon sa maong ordinansa gipahamtangan si Cortes og silot nga “reprimand” kun gipahimangnoan lamang.

Ang desisyon gipirmahan ni Sec. Eduardo Ermita nga penetsahan og Hulyo 27, 2009.

Giklaro sa desisyon nga bugtong ang korte lamang maoy makadeklarar sa usa ka ordinansa nga illegal o nakalapas sa balaod, hangtud nga wala niini, magpabiling balido ang maong gilalisang ordinansa o probisyon.

Gisuwayan pagtawag sa Banat News si Mayor Cortes aron pagkuha sa iyang habig kabahin sa desisyon apan walay motubag sa cellphone niini. – BANAT NEWS