CEBU, Philippines - Nagsugod na og pagpangita og local government units ang Presidential Search for Child Friendly Local Government Units (LGU) nga naghatag og atensyon sa kabataan.
Matud pa ni officer-in-charge (OIC)-Executive Director Parisya Taradyi sa Council for the Welfare of Children (CWC) ang Presidential Award ang pasidungog ihatag ngadto sa mga lungsod ug dakbayan nga dako og papel sa pagprotiher sa katungod ug kalamboan sa kabataan.
Ang maong programa ang nangita og LGU nga nakahatag sa mga panginahanglan sa kabataan pinaagi sa mga programa, proyekto ug mga serbisyo ngadto sa kabataan.
Ang maong pagpili dunay lima ka kategoriya mao ang mga mosunod (a) 1st-3rd class municipalities, (b) 4th-6th class municipalities, (c) Component City, (d) Independent Chartered City ug (e) Highly Urbanized City.
Dinhi sa Central Visayas, usa ka Regional Awards Committee (RAC) ang gitukod aron maoy moatiman, mosusi ug mokumpirmar sa usa ka LGU kun kini matawag bang “child friendly.”
Kini gilangkuban sa Regional Sub-Committee for the Welfare of Children (RSCWC) nga girepresentaran sa mga mosunod nga ahensiya: Department of Social Welfare and Development (DSWD), Department of Education (DepEd), Department of Interior and Local Government (DILG), Dept. of Health (DOH), Department of Labor and Employment (DOLE), Philippine Information Agency, National Economic and Development Authority (NEDA), National Nutrition Council (NNC) ug representative sa non-government organization (NGO).
Ang deadline sa pagsumitir sa mga entries gikatakda karong Septiyembre 7, 2009 ngadto sa Provincial Technical Working Group (PTWG).
Ang screening, validation ug selection sa Regional Awardees ang ipahigayon sa Nobiyembre 30, 2009 ug ang actual Awarding Ceremony ang ipahigayon sa buwan sa Abril tuig 2010.
Ang outstanding winners sa kada kategoriya ang makadawat sa mga mosunod nga award: Outstanding Regional Winner (Regional Seal ug P50,000), Presidential Award (Regional Trophy ug P300,000) ug Hall of Fame Awardee (Glass Trophy ug P500,000).
Ang tanang mga LGU nga short listed isip mga National Finalist ang makadawat og plaque of recognition.
Ang mga detalye ug form request ang pweding ma-download sa website sa Council for the Welfare for Children (www.cwc.gov.ph ) o tawag sa DSWD Specialist nga si Josephine Belotindos sa mga numero 032-232-9505.
Ang accomplishment entry form ang kinahanglang isubmiter uban sa tanang mga required supporting documents ngadto sa Provincial Social Welfare and Development Office sa DSWD field office-7 nga nahimutang sa M.J. Cuenco and General Maxilom Streets, dakbayan sa Sugbo.
Ang dakbayan sa Sugbu maoy naghupot sa tulo ka sunod sunod nga pasidungog gikan sa maong award-giving body. (Brenda Batuto) (BANAT NEWS)