Atan anti-dengue campaign gilusad

CEBU, Philippines - Bisan paman sa gidangatan sa sports activities ni congressional aspirant Jonathan “Atan” Guardo nga gidid-an nang makagamit sa mga pampublikong pasilidad sa mga barangay, lain na usab nga programa ang gilusad niini kagahapon.

Kini mao ang anti-dengue campaign nga tumong mao ang pagpamenus sa mga kabataang nangataptan sa maong makamatay nga sakit nga dugay nang mihasi sa komunidad.

Si Guardo mihimo sa unang lakang sa iyang programa “Guards Against Dengue’s Spread diha sa sitio Kaduloy sa barangay Tisa ning dakbayan nga gitambungan sa gatusang mga residente.

Si Guardo nagdala og usa ka doktor ug usa ka nurse nga nasuhito sa kinaiya sa maong makamatay’ng lamok ug mitabang sa pag-esplikar sa mga residente kabahin sa maong sakit ug kung unsaon gyud kini nga malikayan.

Pipila sa mga residente ang nalipay sa programa ni Guardo sanglit giingong bisan usa ka hingtungdan sa panglawas sa dakbayan walay nakahimo niini diha sa ilang barangay.

Ang Tisa maoy usa sa mga barangay sa dakbayan nga naapektahan sa maong sakit ug duna na say namatay. Nag-una sa talaan sa dakbayan nga dunay namatay nga pasyenteng nasakit niini mao ang barangay Camputhaw.

Samtang si Guardo mipahibalong mopahigayon siya og TV ads nga magsentro kung unsaon paglikay sa sakit nga dengue ug pagpatay sa mga lamok nga nagdala niini.

Dili palang dugay, si Mayor Tomas Osmeña naalarma na sa gidaghanon sa nakalas niining tuiga sa maong sakit tungod sa natalang 23 ka tawo na ang namatay ug 757 ang nasakit sukad niadtong Enero ning tuiga hinungdan nga mimando kini og hiningusgang kampanya. (Edwin Ian Melecio)   (BANAT NEWS)