Duha ka batan-on gipusil, 1 patay

CEBU, Philippines - Usa ang patay ug laing usa ang naangol sa duha ka mga batan-on nga gipamusil samtang namauli gikan nga mitambong og disco sa sitio Langub barangay Balaygtiki lungsod sa Dumanjug kagahapon sa alas 4:55 sa kaadlawon.

Ang biktima nga patay nang nadangat sa tambalanan mao ang drayber sa motorsiklo nga si Lemuel Estrilloso, 21, samtang ang naangol mao si Doroteo Lanojan Jr. pulos molupyo sa nahisgutang lugar.

Samtang tulo ka mga batan-ong lalaki nga wala pa mailhi ang pangalan maoy gitumbok nga maoy responsable sa maong pagpamusil.

Subay sa imbestigasyon sa kapulisan sa lungsod sa Dumanjug nga ilang gipadangat sa Cebu Provincial Police Office (CPPO), paingon na mamauli ang mga biktima sakay sa ilang motorsiklo gikan sa disco nunot sa kapistahan sa barangay Canghumaod.

Gikatahong gisundan ang duha sa tulo ka mga lalaking nag-angkasay sakay usab og motorsiklo ug pag-abot sa nahisgutang lugar kalit lang nipaduol ug nisikit ang motorsiklo sa mga gikatahapan ug ang duha ka angkas niini ang nagdungan og pusil sa mga biktima.

Ang biktima nga si Lemuel nakaangkon og duha ka samad pinusilan sa iyang hawak ug walang paa samtang si Doroteo nakaangkon og samad pinusilan sa iyang sampot.

Ang duha gibiyaan lang usab dayon sa mga namusil dihang natumba ang gisakyan nga motor sa mga biktima.

Daling gihatod sa Barili District Hospital ang mga biktima apan gideklarar nga dead on arrival si Estrilloso ug luwas na sa peligro ang kauban niining si Lanojan.

Ang kapulisan padayun pa sa ilang imbestigasyon pagtumbok sa mga suspek ug sa motibo sa krimen. (Darrel Carumba)    (BANAT NEWS)