CEBU, Philippines - Ang hepe sa Talisay City Engineering Office (TCEO) wala masayod sa rason sa pagpahunong sa Department of Public Works and Highways (DPWH)sa gitrabaho niining lane separator diha sa barangay Tabunok.
Matud pa ni Engineer Audie Bacasmas, hepe sa TCEO nga wala mopahibawo kaniya ang mga kadagkoan sa DPWH nganong gipahunong niini ang maong proyekto.
Apan may mga taho nga gumikan kuno kay walay program of work ang TCEO maoy hinungdan nga gimando sa DPWH ang paghunong sa maong trabaho sa miaging adlaw.
Ang hepe sa second engineering district nga si Daisy Toledo wala mohatag og komentaryo bahin niini tungod kay dili gustong mosipyat sa iyang ipanulti.
Si Bacasmas nagkanayon nga may gipadala kunong suwat ang DPWH niadtong Agosto 18, 2009, apan didto kini iadres kang Konsehal Arturo Bas, chairman sa Traffic Commission, ug Konsehal Rodolfo Cabigas, chairman sa Committee on Public Works and Highways busa wala siya makabasa niini.
Sa maong suwat gitumbok ni Engr. Toledo nga wala magkadimao ang maong proyekto tungod kay walay maayong sumbanan nga mogiya sa DPWH sa iyang trabaho, hinungdan nga gipahunong kini.
Si Bacasmas mipasabot nga ang maong proyekto iya sa lokal nga kagamhanan sa Talisay alang sa proteksyon sa publiko gikan sa disgrasya sa dalan, apan ang program of works niini mag-agad sa pagtugot sa mayor.
Matud ni Bacasmas nga ang board sa TraffCom maoy misugyot sa pagpataod og lane separator ug wala siya’y kalibotan kung ang board misumite ba sa program of work ngadto sa DPWH. – BANAT NEWS