Pabrika sa muwebles nasunog

CEBU, Philippines - Faulty electrical wiring maoy gipasanginlan sa nahitabong sunog sa usa ka pabrika sa mga muwebles didto sa barangay Catarman sa lungsod sa Liloan diin mikabat og P500,000 nga kadaut niini sa miaging adlaw.

Si FO3 Edwin Jopia, imbestigador sa kabomberohan sa maong lungsod miingon nga nagsugod sa production department sa Finger Joint Laminated Board Furniture Company nga gipanag-iya sa usa ka negosyanteng Hapon nga si Ritchie Yamanato ang maong kayo.

Dugang pa niya nga ang edipisyo sa maong pabrika gipanag-iya sa Tao Industries Inc. ug igo lamang nag-abang niini si Yamanato alang sa negosyo niining furniture.

Si FO2 Jopia miingon nga ang alarma ilang nadawat alas 2:50 ang takna sa hapon ug ilang nakontrol ang kalayo sa alas 3:20 na sa hapon pinaagi sa pagtinabangay nila og pawong niini.

Hinuon maayo nalang kay walay naangol o kinabuhing nakalas sa maong sunog samtang padayon pa nilang gisuta ang tinuod nga sinugdanan niini. – BANAT NEWS