Ulitawo nasakmita'g shabu

CEBU, Philippines - Nasakmit sa kapolisan sa miaging adlaw ang duha ka pakete nga shabu ug mga kahimanan sa paggamit niini gikan sa usa ka batan-ong lalaki nga gikatahapang pusher og shabu didto sa purok Nangka, Kinalumsan, barangay Looc, dakbayan sa Lapulapu sa miaging adlaw.

Ang suspetsado mao si Joel Cabigas, 21 , ulitawo, nga taga purok Nangka.

Si SPO4 Danilo Tampus sa kapolisan sa maong dakbayan nga nahinabi sa Banat News miingon nga ang team sa kapolisan nga gipangulohan ni PO3 Arnel Bender maoy nakadakop sa maong suspetsado.

Dugang pa ni PO3 Bender nga samtang nagpatrolya sila sa maong dapit, nasigpatan nila ang suspetsado nga katahapan kaayo ang lihok nga maoy hinungdan nga gisita kini nila.

Matud pa ni SPO4 Tampus nga wala kaikyas ang suspetsado kay dihang girekisa kini nila didto ra sa iyang lawas ang mga kahimanan sa paghingos og shabu nga naglakip sa tin foil ug duha ka plastic nga gisudlan og gituohang shabu . – BANAT NEWS