Lalaki miluba sa uyab sa kapuyo gikiha

CEBU, Philippines - Ang lalaki nga nanunggab sa uyab sa iyang kapuyo sulod sa usa ka supermarket sa barangay Mabolo sa miaging gabii gipasakaan na og kasong murder kagahapon.

Apan si Melvin Compra, residente sa Fontanosa Compound, Wireless Subangdaku, Mandaue ug lumad nga taga Kamobuan, Tabogon, Sugbo miasoy sa Banat News nga wala siya magmahay sa iyang gibuhat tungod kay wala na siya makaagwanta sa pagluib sa iyang kapuyo nga si Arlene Nuñez.

Ang nadunggaban ug namatay pipila ka oras ang milabay nailhan nga si Arnold Bonghanoy, 20, stock refiller sa maong supermarket.

Gibutyag ni Compra nagsipok ang iyang ulo tungod sa problema ug gisamotan pa kini sa dihang nakigbulag kaniya si Nuñez nianang pagkabuntag hinungdan nga nakadesider siya sa pagbuhat sa maong krimen.

Dugang pa ni Compra nga iyang nasayran nga adunay uyab ang iyang kapuyo tungod sa mga video nga iyang nakita gikan sa iyang higala nga nagpamatuod nga aduna gayuy relasyon ang iyang kapuyo ug si Bonghanoy ug misamot ang kasakit sa iyang dughan sa dihang mitug-an sa ilang relasyon si Nuñez.

Kapin sa upat ka tuig nga nagpuyo si Compra ug si Nuñez ug nagbunga kini og anak lalaki nga upat na ka tuig ang edad. Si Bonghanoy ug Nuñez, matud ni Compra, duha pa lang ka buwan nga nagka-uyab.

Kahinumduman, alas 5 sa hapon mipalit si Compra og kutsilyo sa department store nahimutang sa ika-upat nga andana ibabaw sa supermarket ug mao kini gigamit sa pagdunggab sa tiyan ug dughan ni Bonghanoy. - Lesley Caminade (BANAT NEWS)