CEBU, Philippines - Usa ka armored van security escort ang aksidenteng nakapusil og tulo ka tawo, usa na niini ang drama talent sa sibyaanang DyHP human mobuto ang iyang shotgun nga gidala diha sa Osmeña Boulevard sa barangay Kalubihan kagahapon sa hapon.
Nagtingkagol karon sa karsel sa kapolisan ang suspek nga si Richard Dela Torre, 28, molupyo sa wireless syudad sa Mandaue nga sakop sa ROCA Security Agency ang aksidenteng nakapabuto sa iyang shotgun nga service firearm.
Ang naigo nga dramatorgo sa DYHP nailhan nga si Ranie Bodomo, 25, taga sitio Ipil-Ipil barangay Alaska Mambaling ug ang laing duha ka mamaligyaay og simcard nga sila Charlyn Navaja, 26, ug Adonis Abella, 23.
Sa imbestigasyon sa kapolisan nasayran nga ang suspetsado nag-escort sa armored van nga mokuha og kwarta sa Unitop sa nahisgutang lugar apan sa iyang paglayat nakablitan niini ang iyang shotgun.
Ang mga bolitas bisan og adto gitunong ang sumbuhan sa armas sa semento nangalagpot didto sa mga biktima hinungdan sa pagkaigo ni Bodomo sa duha niya ka bukton ug suwang samtang ang duruha usab nakaangkon ug samad sa ilang bukton ug naigo usab si Navaja sa iyang paa.
Ang tulo ka biktima nga nalandig sa Cebu City Medical Center andam nga mopasaka og kaso batok sa gwardiya.
Matud pa ni SPO1 Joseph Joy Mandal sa Carbon Police Station sa pakighinabi sa Banat News nga pasakaan og kasong Reckless Imprudence Resulting to Multiple Physical Injuries ang suspek. - Lesley Caminade (BANAT NEWS)