CEBU, Philippines - Usa ka ulitawo ang naghikog pinaagi sa pagdunggab sa iyang kaugalingon tungod sa kahiubos sa iyang igsuong mibadlong kaniya nga dili magpalabi pag-inom niadtong nilabay’ng gabii sa barangay Taytay dakbayan sa Danao atol sa ilang pista.
Patay nang nadangat sa Danao District Hospital si Reglo Pantoja 21, nagpuyo sa nahisgutang lugar human iyang giunay sa pagdunggab og kutsilyo ang iyang walang dughan human sa magkalalis sa iyang igsuon.
Si SPO1 Eldefonso Procia, sa Danao Police Station nga gikahinabi sa Banat News nagkanayon nga ang naghikog nga si Pantoja pwerteng huboga niadtong Miyerkules sa gabii nga nakig-inom sila sa iyang mga kabanay, higala.
Apan gikatahong sa dihang nagkalami na ang ilang panig-inom ug pagkanta-kanta sa videoke diha sa ilang silingan kalit lang miabot ang igsuon niini ug mibadlong kaniya ug ingon man kabahin sa kwarta.
Matud pa ni SPO1 Procio nga ang iyaan sa naghikog nga wala magpaila nagkanayon nga kwarta ra gyud ang gilalisan sa managsuon ug dihang gitambagan usab nga paulion nalang ug dili na paimnon kay hubog na kaayo.
“Gibadlong sa ni siya sa iyang manghod nga dili na daw mopalabig inom kay hubog na kayo, nagwandog-wandog na sa paglakaw,” sumala pa ni SPO1 Procia.
Gikatahong nipauli sa ilang panimalay si Pantoja apan nakurat nalang sila dihang nisulod kini sa kusina sa ilang panimalay nikuha’g kutsilyo dayon giduslak sa iyang walang dughan.
Matud pa ni SPO1 Procia nga grabe ang samad ni Pantoja gumikan kay diha kini maigo sa ubos sa kasing-kasing ang igo niini hinungdan nga bisan kun nadala pa unta sa tambalanan gideklarar sa mga doktor nga DOA.
Dugang pa niini nga maayong tawo ang biktima ug walay bisan unsang bati nga rekord sa ilang barangay.
Sumala pa sa mga imbestigador sa kapulisan walay foul play nga nakita sa kamatayon niini. – BANAT NEWS