65-anyos patay sa motel

CEBU, Philippines - Usa ka retiradong kawani sa usa ka airline company ang napalgang patay sulod sa usa ka motel ug gituohang giatake sa iyang sakit ang hinungdan niini.

Ang namatay sulod sa Queensland Motel diha sa General Maxilom Avenue Extension barangay Carreta niadtong Miyerkules sa gabii giilang si Rodolfo Pailan, 65, taga Sambag II ning dakbayan sa Sugbu.

Si PO3 Geoffrey Gutual, imbestigador sa Homicide Section sa Cebu City Police Office nga gikahinabi sa Banat News nagkanayon   nga mi-check-in si Pailan sa maong motel nga alas 9:04 niadtong Miyerkules sa gabii uban sa usa ka batan-ong babaye nga gibana-banang 17-18 anyos sakay sa usa ka Honda Civic nga may TNF-144.

Matud pa niini nga pagka-alas 9:45 ang maong babaye nagdali kining migawas sa maong motel ug misakay sa usa ka taxi apan mipahibalo pa kini sa gwardiya nga si Benidecto Pamulagan nga ipatan-aw ang iyang kuyog sa room 225.

Ang gwardiya nga si Pamulagan maoy mipahibalo sa ilang mga staff sa hotel ug ang supervisor nga si Merly Garbo maoy nakakita kang Pailan nga hubo na apan walay kinabuhi ibabaw sa kama.

Nakuha sa crime scene ang mga ID ug uban pang importanteng butang sa namatay lakip na ang cash nga P26,900 hinuon walay nakitang dunay foul play ang kamatayon niini. – BANAT NEWS