2 ka Indian milugos sa maid naka-piyansa

CEBU, Philippines - Duha ka Indian nga gipasanginlang mibanos-banos og lugos sa ilang katabang nga menor de edad ug gipasakaan og kasong rape gitugotang makapiyansa alang sa ilang temporaryong kagawasan.

Si SPO1 Margienette Yosores sa Talisay City Police Station Women and Children’s Protection Desk sa pakighinabi niini sa Banat News kagahapon mibutyag nga ang kasong rape nga iyang gipasaka batok nila ni Gurpreet Singh ug Jaskaran Singh giingong gipaubsan sa piskaliya sa Talisay.

Ang kasong rape gipaubsan nalang ngadto sa acts of lasciviousness ug gitugotan ang duha nga makapiyansa niadtong Agosto 12, 2009 nga mao usab ang gitakdang adlaw nga balhinon ngadto sa Talisay City Jail ang duha.

Kahinumduman nga ang maong mga Indian gipasanginlang mibanos-banos og lugos ug mitanggong sa biktima diha sa ilang gipuy-ang balay sa Hacienda Milan, barangay Maghaway.

Niadtong buwan sa Hulyo na-rescue sa mga polis ang biktima tungod sa tabang sa laing katabang nga silingan sa mga suspek. Si Talisay City Prosecutor Marshal Rubia sa pakighinabi niini sa Banat News kagahapon mihimakak nga gipaubsan niya ang kasong gipasaka batok sa mga suspetsado.

Matud niini nga ang kasong naduso batok sa mga Indian mao ang kalapasan sa Akta Republika Section 5 (b).

Gipasabot ni Rubia nga sa iyang gipahigayong clarificatory hearing sa inquest proceedings nasuta nga ang biktima dunay pagtugot sa mga suspetsado sa gibuhat nila kaniya.

Matud niini nga iyang nasuta nga dunay higayon nga mibiya ang biktima gikan sa balay sa iyang mga amo apan mibalik kini tungod sa tanyag nga patas-an ang iyang sweldo ug ang mga amo niini ang nangayo og pasaylo sa ilang gibuhat ug misaad nga dili na mousab.

Matag usa nila ni Gurpreet ug Jaskaran ang gipabayad og P300,000 nga piyansa alang sa ilang temporaryong kagawasan. – BANAT NEWS