3 ka tulisan nasikop sa Lapu hadlok diay sa DDS

CEBU, Philippines - Tulisan nga nadakpan sa dakbayan sa Lapulapu gibaharan diay sa mga sakop sa Davao Death Squad maong dinhi sila mibalhin sa Sugbo sumala pa sa kapolisan.

Giila ang tulo mao sila si Ryan Dinampo Cajes, 24, Roldan Secuya Rosada, 24, ug ang igsuon niining si Ricardo Secuya Rosada, 22 , pulos lumad sa Digos, Davao ug temporaryong nagpuyo sa sitio Ka-inso, Basak dakbayan, Lapulapu.

Ang tulo nadakpan human mangawat sa usa ka gasoline station sa barangay Basak dakbayan sa Lapulapu sa milabay'ng hapon diha sa Tamiya, sa Basak dakbayan sa Lapulapu nga gipanag-iya ni Patrick Tan ug representahan ni Mario Ucab Temple ang supervisor sa maong gas station.

 Base sa imbestigasyon ni PO3 Elmer Canillo sa Crime Against Property (kanhi TRS) nasayran nga ang mga suspetsado nagpakaarong ingnong customer.

Apan sa dihang mibiya sa iyang pwesto ang cashier daling mihulip si Cajes sa kaha niini ug gikuha ang halin niini nga mikabat sa 5 mil ka pesos cash dayong sibat sa maong dapit.

 Atol sa ginukdanay si Dinampo naumod sa yuta luyo nga bahin sa koral sa maong gas station human kini maguniti sa usa sa mga pumpboys, apan nakabuhi gihapon kini.

Ang mga miabot nga mirespondeng kapolisan pinanguluhan ni Insp. William Homoc miapil dayon og gukod hangtud nga sila naabtan ug nasikop.

 Atol sa ilang pagkasikop nakuhaan usab og mga linikit nga marijuana ug napulo ka paketeng gidudahang shabu ang magsuon.

 Matud pa ni PO3 Canillo nga didto sa Davao City ang tulo miangkong gikan sa Davao tulo pa ka adlaw na ang nakalabay dihang gibaharan sila sa gitawag nga Davao Death Squad nga mag-usab, apan mas gipili nilang moanhi sa Sugbu. – BANAT NEWS