CEBU, Philippines - Nadala ang P7 mil sa tulo ka wala mailhing tulisan ang halin sa usa ka gasoline station niadtong Miyerkules sa kaadlawon sa barangay Taytayan lungsod sa Bogo.
Si PO3 Ramonito Canja, sa Bogo Police Station nga gikahinabi sa Banat News nagkanayon nga ang tulo ka tulisan gikatahong nagsakay’g motorsiklo mitulis sa Petron gasoline station sa nahisgutang dapit nga gipanag-iya ni Edilberto Dilao.
Matud pa ni PO3 Canja, nga ang tulo kalit lang naabot ug nagpakaaron-ingnong customer, apan ang duha ka angkas kalit lang nanion og armas dayong deklarar og tulis sa pump boy nga mao say kahero nga si Jeymar Jumao-as, 20.
Ang tulisan mipusil sa guwardiyang si Jolito Oyad, 29, taga San Remegio apan gi-swerte ang guwardiya tungod kay wala maigo kay siya nakadagan.
Ang mga suspetsado nakadala og P7 mil nga halin sa gasoline station ug wala na kini maabti pa sa mga mi-respondeng polis.
Nakuha sa cashier both ang usa ka parisan sa brown nga sinilas nga gipanag-iya sa usa ka tulisan ingon man ang plastic nga granada nga gigamit sa mga tulisan paghulga sa mga biktima.
Hinuon si PO3 Canja mitataw nga sa ilang tan-aw mga local boys lang ang mga tulisan tungod kay sa ilang pagpanulis dunay mga buslot.
Usa na niini ang tsinelas sa akusado nga nahibilin, ingon man plastic nga granada, ug naratol usab dihang nakapabuto ang kauban sa mga tulisan ngadto sa gwardiya. – BANAT NEWS