Bata sa duyan napaig sa sunog

CEBU, Philippines - Ang nasunog nga junkshop gipanag-iya sa pamilyang Palalay nga namalit og mga scraps sa dapit lakip na gikan sa Mactan Economic Processing Zone.

Ang sunog nagsugod alas 5:12 sa hapon ug gumikan sa kadaghang stocks niining mga scraps nga naglangkob dili lang mga metals duna sad kini daghang mga plastics nga nakaingon nga gisaka dayon sa Task Force Alpha ang alarma ni Fire Marshal Ricardo Cornelio.

Giila ang gituohang napaig mao si Cris John, usa pa ka tuig nga bata nga wala na hikit-i sa iyang mga ginikanan atol sa pagkasunog sa ilang gipuy-ang junkshop.

Matud pa sa amahan sa bata nga si Salvador Baylon kagahapon sa Banat News, dihang nagsugod na ang pag-ulbo sa kalayo nalipat sila   tungod sa pagdali nila paghipos sa ilang mga butang paggawas sa balay

Sumala pa ni SFO2 Diomed Alburo, fire investigator sa maong hitabo sa Banat News ang inahan sa bata nga si Joan Lanoy mibutyag nga migawas siya sa balay niadtong tungura aron pagpalit og sud-an ug gibilin ang ilang anak, sa iyang pagbalik dako na kaayo ang sunog diha sa compound.

Ang mga bombero mikuykoy sa mga nagbagang debris sa sunog lakip na ang amahan sa bata aron pagpangita niini.

Dunay nakaplagang daw usa ka gamay'ng patay'ng lawas nga napaig diha sa gikahimutangan sa maong duyan.

Ang amahan nagtuong mao kini si Cris John apan ang kabumberuhan wala dayon mokumpirmar nga bata gyud o iya sa tawo ang patay'ng lawas sanglit wala pay medical personnel nga nakasusi niini ug bugtong ang Homicide Section ra maoy makadeklarar niini.

Base sa inisyal nga imbestigasyon ni Alburo, si Lanoy mitug-an nga sa wala pa ang sunog, gikatahong nagpunay og pawong-pawong ang ilang electric fan, nagtuo karon si Alburo nga posibleng electrical misuse ang hinungdan apan mosusi pa sila sa ubang posibleng nakaingon sa maong insidente.

Sumala pa sa mga opisyales sa barangay mao na kini ang ikaduhang higayon nga nasunog ang maong junkshop compound, duha ka tuig na ang nakalabay dihang miulbo ang sunog sa maong dapit apan dali rang napawong. (BANAT NEWS)