Treasure hunting sa Argao

CEBU, Philippines - Gisusi sa mga awtoridad ang report nga dunay gipahigayong treasure hunting sa Argao Central School sa lungsod sa Argao sa usa ka septic tank sa maong tunghaan. Ang maong bangag gituohang nagsilbing armory ug posible usab gilubngan og mga bulawan sa mga Hapon atol sa milabay'ng Ikaduhang Gubat sa Kalibutan.

Si PO1 Bernie Lao sa Argao Police dihang nahinabi sa Banat News nga niadto pang Lunes sa milabay'ng semana nila nadawat ang report gikan sa tanod sa barangay Poblacion nga si Andres Alalit kinsa mipahibawong may tulo ka mga tawong nag-treasure hunting sa kilid nga bahin sa maong septic tank sulod sa maong tunghaan.

Matud pa ni PO1 Lao nga dihang ilang gisusi gikatahong nangatarungan ang prinsipal sa maong tunghaan nga si Willy Adunay Jr. nga igo lang niyang gisugo ang mga tawo sa pagpahabwa ug paglimpyo sa maong septic tank ug dili tinuod nga dunay treasure hunting operations.

Apan bisan paman sa maong pamahayag, gikatahong padayong namatikdan sa mga molupyo sa maong lugar nga nagpadayon ang pagkawot sa kilid nga bahin sa maong septic tank.

Hinungdan nga gikabalaka na og maayo sa mga ginikanan sa mga bata nga nagtungha tungod sa posibilidad nga mahugno ang pipila ka edipisyo tungod sa nagkalapad nga pagkawot sa ilawom nga bahin niini.

Ang mga molupyo sa maong lugar pinangulohan sa kanhi kapitan sa barangay Poblacion nga si Arnel Dela Cruz maoy nangulo sa pagpapirma og petisyon sa mga ginikanan   gikahinabi sa Banat News miawhag kang Mayor Edcel Galeos paghimo og pakisusi nga ipatan-aw og mga bomb experts ang dapit.

Gikatahong nabalaka ang mga ginikanang sakop sa Argao Central Elementary School-Parents Teacher Community Association ug mga molupyo sa maong dapit nga basin tinuod nga may bomba sa maong dapit.

Gidemanda usab sa mga ginikanan ang dinali-ang pagpabalhin sa mga tinun-an diin nahimutang sa duol sa nagpadayong treasure hunting ang ilang mga classroom aron malikay kini ug dili mabutang sa peligro kun kini mahunlak.

Apan ang prinsipal sa Argao Central School ni-insister nga walay treasure hunting ug gipadayag niini nga igo lang niyang gisugo ang pagpalimpyo sa maong septic tank.

Sanglit ang hugaw sa pito ka kasilyas sa ilang tunghaan diha tanan padulong. Ang principal nga si Adunay mitug-an sa Banat News nga dili siya motuong may treasure sa ilawom sa maong bangag.

“Di man ko motuo anang treasure-treasure kay wala pa ko'y nakit-ang nadato ana,” pagklaro pa niini.

Kagahapon sa udto gipadala dayun ni Galeos ang municipal engineer sa lungsod sa maong lugar aron paghimo og pakisusi sa gikataho nga treasure hunting sa hurisdiksiyon sa maong tunghaan apan wala pay report sa findings sa paghimo ning balita. (BANAT NEWS)