2 ka notadong tulisan tiklo

CEBU, Philippines - Duha ka gipasanginlang notadong tulisan sa mga pasaheroan nga sakyanan sa norte nga bahin sa lalawigan ang nadakpan sa kapolisan sa lungsod sa Liloan sa hot pursuit operation nga ilang gipahigayon kagahapon sa buntag.

Ang nadakpan mao sila si Eve Jivy Espinoza, 21, ug Rodulfo Gobalino, 40, nga nagpuyo sa barangay Yati sa nahisgutang lungsod.

Si PO2 Rutchiel Jugalbot sa kapolisan sa maong lungsod nga nahinabi sa Banat News miingon nga natigayon ang pagdakop sa duha ka suspetsado human usa sa ilang biktima nga si Ryan Cabugason, 22 , nga taga Poblacion, Liloan misumbong sa kapolisan.

Base sa sumbong sa biktima nagsakay siya og multicab nga pasaheroan sa Highway Seno sa dakbayan sa Mandaue paingon sa lungsod sa Liloan.

Sa ilang paghidangat sa Yati, Liloan usa sa kauban niyang pasaherong lalaki ang nagdali og kanaug sa maong lugar ug gilabni ang gidala niyang bag nga gisudlan sa cellphone, uniporme sa basketball ug salapi nga P3,000 ang kantidad.

Human sa maong paglabni midali pagkanaug ang laing kauban nilang pasaherong lalaki ug mipugong kaniya nga dili lang mokanaug kay siya na lamang ang mogukod.

Si SPO2 Cecilio Gomez ug mga kauban dali nga miadto sa Yati, Liloan ug ilang gipakuyog ang biktima tungod kay duna nay ideya ang kapolisan kung si kinsa ang maong mga tulisan.

Tuod man human madakpi positibong giila sa biktima ang mga suspetsado ug nabawi usab nila ang bag ug ang mga gamit sa biktima. – BANAT NEWS