Gikang nanisko gipusil kritikal

CEBU, Philippines - Kritikal ang kahimtang sa usa ka 17-anyos human kini mabiktima sa pagpamusil sa mga sakop sa gang sa sitio Lokata sa barangay Looc, dakbayan sa Lapulapu alas-11 pasado ang takna sa miaging gabii.

Ang biktima mao si Joel Pinas Jr., taga sitio Kinalumsan sa barangay Looc, dakbayan sa Lapulapu.

Si PO3 Candido Baringue nga nahinabi sa Banat News nagkanayon nga gikan pa nga mitan-aw og disco ang biktima ug nag-inusara kining naglakaw pauli sa ilang panimalay.

Matud pa ni Baringue nga nasugatan sa biktima ang duha ka mga batan-ong lalaki nga nailhan lamang nga Louie ug Sunday nga giingong sakop sa gang ug gipusil ang biktima.

Human sa maong pagpamusil ang duha ka suspetsado dali usab nga mipahilayo sa maong dapit ug wala na kini maabti sa mga polis.

Dugang pa ni Baringue nga ang biktima kinsa naigo ang baba ug milapos ang bala sa luyong tangkugo ang unang gidala sa Mactan Doctors Hospital apan human sa pasiunang pagtambal dali usab kining gibalhin sa Vicente Sotto Memorial Medical Center sa dakbayan sa Sugbo. - Romeo   Limpangog (BANAT NEWS)