CEBU, Philippines - Nagplano ang Cebu City Market Authority nga mopahigayon og “Market Visit” sa kamerkaduhan sa kasikbit nga mga dapit sa dakbayan sumala pa ni City Market Administrator Racquel-Bohol Arce subay usab sa planong pagpalabang og amendatory ordinance sa market code sa siyudad.
Matud ni Arce nga ang tumong sa market visit mao ang pag-obserbar sa ubang merkado kung giunsa ang pagpaabang sa mga stalls niini ngadto sa mga vendors.
“Naa tay plano nga mag-market visit on neighboring municipalities aron ato gyong masayran kung unsa pod ang manner of acquiring stalls sa ilang mga vendors,” sumala ni Arce. Nasayran nga plano karon ni Konsehal Christopher Alix nga amendahon ang market code sa siyudad aron pabayron na og performance bond ang mga stallholders.
Ang konsehal nga maoy chairman sa Committee on Markets sa City Council giingong dili pabor sa gipatuman nga abangan sa mga stalls.
Sa kasamtangan, ang mga stallholders nag-abang sa ilang pwesto sa nagkadaiyang satellite market sa dakbayan sibo sa gibungat niini atol sa bidding.
Kini ang hinungdan nga dunay mga stallholders nga nagbayad og mas taas nga abangan itandi sa tupad niining manindahay.
Sa proposal ni Alix giingong parehas na unya ang abangan sa mga stallholders ug kini ipasubay na sa nalatid sa ordinansa.
Kini managlahi lang unya og bayran nga performance bond tungod kay ang gibungat niini nga bid price maoy bayran sa bidder.
Matud pa ni Arce nga sila maoy gitahasan sa konsehal pagtuon sa sugyot niining pagpabayad og performance bond sa dili pa ma-award ang stall ngadto sa usa ka vendor.
Ang proposal ni Alix nakakuha og suporta gikan sa market administrator aron mahatagan usab og patas nga abangan ang mga stallholders.
“Mas maayo na siya nga ideya kay sa lifetime nga mag-suffer ang stallholder pagbayad sa taas nga rate,” dugang pamahayag ni Arce.
Tungod sa maong proposal, posibling malangay pa ang gitakdang bidding sa gipangkandaduhan nga mga stalls sa napulo ka satellite market sa siyudad. – BANAT NEWS