Surplus sa dakbayan gikwestyon

CEBU, Philippines - Gikwestyon sa oposisyon sa siyudad sa Sugbu ang gipasigarbo ni Mayor Tomas Osmeña nga minilyon ka pesos nga surplus sa kagamhanan sa dakbayan.

Si Jonathan Guardo nagduda kun diin gikan ang surplus sa City government tungod kay ubay-ubay nga mga batakang serbisyo sa siyudad ang giingong under funded.

Gani miingon si Guardo nga ang mga barangay kapitan sa dakbayan nagsige og yangungo sa wala paghatag kanila og mga proyekto.

Laing gitumbok ni Guardo mao ang karaan ug gubaon nga mga garbage trucks sa dakbayan, gawas sa giingong pagpabaya niini sa Cebu City Medical Center (CCMC).

“He isn’t transparent, I suggest that he present us a total picture of the City’s 2009 budget and show us a breakdown allocated for debt payment, administrative expenditures, basic services, etc., it’s very basic,” sumala ni Guardo.

Ang pagpunay og pasar sa City Council og supplemental budget gisaway usab ni Guardo ug mihulagway niini nga susama sa “tipid pack” ang gahin sa dakbayan.

“The way they’re doing things now, everything is on supplemental budget, on installment basis, ilang gitigi-tigi, murag tipid pack,” matud ni Guardo.

Alang kang Guardo, pinaagi sa pagpresentar sa total budget sa siyudad dinhi maklaro kung duna bay surplus ang City government.

Apan matud ni Osmeña nga wala sila'y angayang ipamatuod ngadto kang Guardo tungod kay ang pagpasar sa budget usa na ka ebidensya.

Giangkon hinoon sa mayor nga dunay karaan ug gubaon nga mga garbage truck sa siyudad apan kini giingong ayuhon ug ang uban ilang ilisan.

Gitataw usab ni Osmeña nga ang pagpasar og mga supplemental budget sa City Council maoy usa sa ilang paagi paggahin og pundo.

“Of course, that’s the way we do things, we do not budget until we have the money already when we have the money that’s the time we budget it,” nagkanayon ang mayor.

“Mobawos gyud ko, si Guardo, ganahan siya nga ipa-cancel ang assistance sa senior citizens, if the other side wins motuo ko, the senior citizens will not get the benefits anymore, the four thousands because he wants to transfer everything to CCMC,” matud pa ni Osmeña. – BANAT NEWS