Terror leader sa bombing nasikop

CEBU, Philippines - Nadakpan na gyud sa hingpit sa kapolisan ang usa ka giingong lider sa mga teroristang Jemaah Islamiyah nga misuway kaniadto og pamomba sa usa ka dakong department store sa North Reclamation Area tulo ka tuig na ang nakalabay.

Ang tigpamaba sa PNP nga si Sr. Supt. Leonardo Espina niadtong adlaw'ng Biyernes mipahibalong nasikop na si Dinno-Amor Rosalejos Pareja nga nailhan usab sa pangalang Khalel Pareja diha sa Marawi City.

Si Pareja maoy gitumbok nga leader sa Rajah Solaiman Movement nga mga giingong “Balik-Islam” o kadtong mga kaniadto Kristiyano nga misulod sa pagka-Muslim.

Ang maong grupo usab maoy gipasanginlan sa mga awtoridad nga nalambigit sa mga pagpamomba sa nagkadaiyang dapit dinhi sa nasud lakip na ang pagsuway og bomba ginamit ang mortar rounds diha sa usa ka dakong mall sa north reclamation area niadtong Mayo 11, 2006.

Gikatahong ang RSM kaabag sa laing duha pa ka mga terror-groups dinhi sa nasud nga mao ang JI ug ang Abu Sayyaf Gang nga pabiling hulga sa seguridad sa Asya.

 Nasuta usab sa Banat News human sa pagsusi-susi nga si Pareja gradwado sa UP-High School sa Lahug ning dakbayan niadtong tuig 2000.

Si Dinno Amor Rosalejos Pareja base sa rekord niini sa UP-High gipanganak niadtong Hulyo 19, 1981 sa Sariaya, Quezon Province ug nagpuyo sa Hermag Village, barangay Basak dakbayan sa Mandaue.

Si Pareja maoy gitumbok ni Sr.Supt. Agusto Marquez nga kanhi Regional Investigation and Intelligence Division chief sa PRO-7 nga kini mao kauban ug lokal nga kontak sa mga napatay nga sila si Ali Usop alyas Datu Ismael Usop ug Datu Niel Ulama alyas Viktor Jimenez niadtong tungura.

Ang duha nga napatay naabtan sa mga sakop sa Criminal Investigation and Intelligence Branch kaniadto ug gikaengkwentro nila ni Sr. Insp. George Ylanan, gidemalas ang duha kay wala nila matangtangi og tape kaniadto ang granadang ilang gilabay sa mga polis diha sa may A. Soriano St. sa NRA.

Ang grupo maoy gitumbok usab nga may kalambigitan sa ferry bombing nga mipatay og 116 ka tawo niadong 2004 diha sa Manila Bay. Kini maoy ikaduhang labing deadly nga terror attack sa South East Asia human sa Bali Bombing sa Indonesia.

Sumala pa sa kapolisan migamit na sa pangalang Ahmad Mohammad Khalil si Pareja ug gihulagway nga mao nay mipuling lider sa RSM karon human madakpi si Hilarion del Rosario Santos alyas Ahmad Santos nga maoy mitukod sa RSM sanglit giingong ang asawa sa naulahi igsuon ni Pareja.– BANAT NEWS