Mas maayong daghang religious leaders nga mokandidato - Dakay

CEBU, Philippines - Gihangop sa tigpamaba sa Arsobispo sa Sugbu ang plano sa pipila ka religious leaders pagpapili pagka-presidente sa sunod tuig nga eleksyon.

Matud ni Monsenyor Achilles Dakay nga mahatagan na unya og daghang kapilian ang mga botante sa angayang himuon nga presidente sa nasod.

Una nang mideklarar nga mag-presidente sa 2010 elections ang usa ka pari nga nag-politiko nga si Pampanga governor Ed Panlilio.

Nipadayag na usab og interes sa nahisgutang posisyon si El Shaddai leader Mike Velarde ingon man si Eddie Villanueva sa Jesus is Lord (JIL).

Giangkon hinuon ni Dakay nga dakong subidahon sa maong mga religious leaders ang ilang gitinguhang katungdanan.

Kini tungod kay alang sa Monsenyor, duha ka “P” (popularity ug peso) ang gikinahanglan pagdaog sa bisan unsang bugnong lugaynon.

“Kung naa gani modagan let him be popular now, nag-popularize na man gani nang uban diha nga naa pa sa katungdanan kana pa bang wala, unya kung peso ang hisgutan, atong suwayan og amot-amot,” sumala ni Dakay.

Gipadayag hinuon sa Monsenyor nga mas maayong magkahiusa silang Velarde ug Panlilio ingon man ang mga sakop niini aron molig-on ang ilang kawsa.

Nagkanayon si Dakay nga mahimong mopaluyo kang Panlilio ug Velarde ang simbahan kung mangayo og tabang sa kaobispohan ug kaparian. “Nganong dili man nga sakop na nimo na unya dili gihapon ka mo-endorse, kinahanglan lang nga musangpit sila sa mga obispo ug mga pari,” matud ni Dakay.

Usa lang ka butang ang gipanghinaot ni Dakay ngadto sa mga religious leader nga magpapili sa sunod tuig nga eleksyon.

Matud ni Dakay nga kini kinahanglang maoy mangulo sa moral recovery sa nasod ug ipasubay ang ilang katuyoan sa mga lagda sa simbahan. (Elly Bolonos)   (BANAT NEWS)