CEBU, Philippines - Samtang sa laing duguong hitabo, usa ka ginang usab ang gigulgulan og liog sa iyang kaugalingong bana gumikan kay giingong kanunay’ng maglayas-layas ang biktima diha sa ilang pinuy-anan sa sitio Manga Dos sa barangay Mambaling kagahapon sa hapon.
Wala na madala sa tambalanan ang biktimang si Racquel Abellanida, 32, human gigulgol sa banang si Alfredo “Junior” Ortega, 39, kanhi furniture worker sa Mandaue tungod sa kapungot niining milaag na usab ang biktima kagahapon.
Sumala pa sa 12-anyos nga anak sa duha nga gikahinabi sa Banat News nga mao pay pag-abot sa iyang inahan gikan sa Manila kagahapon sa udto ug gisugat sa iyang papa.
Gikatahong malipayon kaayo sila kagahapon kay napundok ang ilang pamilya kauban ang duha pa niya ka mga igsuon, apan nianang pagkahapon gikatahong nawagtang og kalit ang ilahang inahan nga wala mananghid kuyog ang silingang ginganlan og Madonna sa sitio Tugas.
Dihang nauli na, gisukmatan sa ilang amahan ang ilang mama ug gipangutana: “Naa kay uyab no?” apan mihimakak ang biktima ug nahitabo na ang panaglalis.
Nianang tungura nasuko ang iyang papa dayong liab sa iyang inahan ug gikuha ang kutsilyong gihipos kilid sa telebisyon ug gihansakan ang punoan sa liog (lusong-lusong) iyang inahan ug giluglog kini.
Human niini daling midagan ang suspek ug wala na igkita, sumala pa sa bata nga makadaghan nang higayong milarga iyang inahan ug sila lang ang mahibilin, makadaghang higayon usab niyang nakit-an ang iyang papa nga magpunay og hilak kaniadto tungod sa paglaag-laag sa ilang inahan.
Si PO3 Celso Sarona sa Mambaling Police Station nga maoy unang nakaresponde mitug-an sa Banat News nga love-triangle ang unang mitumaw nga report diha sa lugar nga maoy sinugdanan sa kagubot.
Matud pang Sarona nga base sa impormasyong nakuha makadaghang higayon nang mobiya ang biktima nga di mananghid ug nagduda na ang lalaki nga duna kini karelasyong laing lalaki.
Ang biktima gisuwayan pa og aswat sa mga silingan aron ihatud sa tambalanan apan pipila palang ka metros namatay na gyud kini. Ang magtiayon dunay upat ka mga anak nga nag-edad og 12, 15, 9 ug 6-anyos. Ang Homicide Section padayon pang nagpangita sa suspek atol ning pagsulat sa balita.(Lesley Caminade uban sa report ni Guamittos Logroño) (BANAT NEWS)