Martino Abellana nga pintor gipasidunggan

CEBU, Philippines - Sa paghatag og pasidungog ug paghandom sa kanhi artist ug paintor sa Sugbo nga si Martino Abellana, ang Ramon Aboitiz Foundation, Inc. mipasiugda sa “Abellana and his Harvest” exhibit niadtong Biyernes sa hapon diha sa Gallery sa Casa Gorordo Museum, sa barangay Pari-an, ning dakbayan sa Sugbo.

Ang nahisgutang exhibit maoy ika-tulo ug kataposang seri sa Abellana retrospective exhibit nga nagsugod niadtong Nobiyembre sa milabay’ng tuig nga magpadayon hangtud karong Oktobre 30, 2009.

Tumong niini mao ang pagpasidungog ug paghandom sa premier visual artist sa Sugbo ug aron usab ang publiko ilabi na ang mga estudyante masayod sa kadungganan sa Sugbo sa natad sa arte.

Ang mga gipasundayag mao ang mga painting sa mga estudyante kanhi ni Abellana nga mao sila si Gabriel Abellana, Edgar Carabio, Adeste Deguilmo, Sofronio dela Cerna, Jayme Francisco, Fred Galan, Luther Galicano, Bernardo Hermoso, Elena Larrazabal, Palmy Pe-Tudtud, Celso Pepito, Henrietta Piczon, Max Siao, Antonio Vidal, Mar Vidal, Arlene Villaver, Jose Yap Jr. ug Sonia Yrastorza.

Ang maong mga artist gipagama og tagduha ka mga painting, niadtong panahon nga nag-apprentice pa sila kang Abellana .

Si Pepito, 52, nga nahinabi sa Banat News nagkanayon nga sa art work kinahanglan nga aduna kay kaugalingong identity bisan og wala pa kini signature ug lagda sa naggama.

Gawas niini kinahanglan usab sa trabaho nga ubanan og gugma aron maayo ang resulta.

Niadtong 1981 si Pepito migradwar sa University of the Philippines, Cebu College sa kursong Fine Arts diin nakagama na siya og 50 ka group exhibit ug lima ka solo exhibit ug consistent award winner sa nagkalain-laing local nga kompetisyon.

Si Pepito kinsa full time painter, nahimo usab nga presidente sa Cebu Art, Inc.

Sa laing bahin, si Martino Abellana , kinsa natawo sa lungsod sa Carcar, Cebu niadtong tuig 1914 , maoy ika-upat sa pito ka anak ni Teofilo Abellana.

Si Martino, gitudloan kabahin sa art sa iyang amahan ug sa apohan niining si Gonzalo o “Maestro Saloy” sukad pa sa linghod pa ang iyang panuigon.

Si Martino kinsa nakakuha og full scholarship sa UP Manila School of Fine Arts migraduwar niadtong tuig 1938 ug mibalik nganhi sa Sugbo diin siya nailhan sa iyang mga ginama nga landscape, still life ug portrait.

Niadtong tuig 1985 si Martino nakabiyahe ngadto sa Europe dihang 50-anyos na siya tungod sa tambag sa iyang professor sa UP Manila nga si Vicente Rivera Mir.

Nabisitahan ni Martino ang mga lugar sa Prado sa Madrid, National Gallery of London, Louvre sa Paris ug ang uban pang inila nga museum sa Roma. (Brenda D.Batuto)   (BANAT NEWS)