Bahin sa personal interest ni Cabrido: Environmental lawyers di motuong Saavedra

CEBU, Philippines - Gisalikway ug wala motuo ang mga environmentalists sa pamasangil sa Kapitolyo nga dunay business interest ang environmentalist lawyer nga si Atty. Benjamin Cabrido sa iyang pagpakigtagbo sa mga opisyal sa dakbayan sa Mandaue.

Kini kabahin sa giingong pagtudlo niini og alternatibong pamaagi sa paghipos sa mga basura ug dumpsite dihang gisirad-an ang Umapad dumpsite sa maong siyudad.

Si capitol consultant Rory Jon Sepulveda nitug-an atol sa gipatawag nga press conference sa milabay’ng Biyernes nga nakadawat siya og text messages nga nagpahibawong may business interest si Cabrido pagrekomendar niini sa Material Recovery Facility nga gipanag-iya sa usa ka Korean national nga maoy himuong labayanan og basura human gipasirad-an ang Umapad dumpsite.

Hinuon si Atty. Cabrido daling mitubag ug miangkon sa mao niyang tigum tali kang Bise Mayor Carlo Fortuna nga mirekomendar gyud siya og alternatibong dumpsite apan gi-klaru niyang dili sa MRF kun dili sa landfill sa lungsod sa Consolacion.

Si Cabrido gidapigan sa laing environmentalist lawyer nga si Atty. Antonio Opposa kinsa mipadayag nga dili siya makatuo sa pamasangil sa Kapitolyo sa ilang kauban.

Alang kang Atty. Opposa ligdong ug sinsero sa ilang kawsa si Cabrido ug dili siya makatuong makahimo sa gipasangil sa Kapitolyo ang ilang kauban.

Gi-awhag hinuon ni Opposa ang mga opisyal sa Kapitolyo pinangulohan ni Gobernador Gwendolyn Garcia nga diretsuhon og tubag ang daghang pangutana sa publiko kabahin sa kontrobersyal nga pagpalit sa 25 hektaryas nga luna sa Balili Property sa Tinaan, Naga.

Ang maong luna giingong sobra sa katunga ang katubigan ug gipalit sa kantidad nga 98 milyones pesos sa milabay’ng tuig.

Ang maong kontrobersya nautingkay human magkalantugi sa mga pamahayag sa media sila si Garcia ug mga environmental lawyers kabahin sa plano unta sa Kapitolyo nga pagsulod sa usa ka kasabutan tali sa Korean Electric Power Corporation nga mogamit og fossil fuel.

Ang Kapitolyo naglaraw untang moabuno sa mga coal ash unya sa maong planta diha sa gipalit niining Balili property nga giingong patukuran og pantalan, apan kini gibabagan sa mga environmentalist tungod kay makadaot kini sa kinaiyahan.

Tungod sa maong isyu naukay hasta ang titulo sa maong luna ug diha na mahibaw-ing nasanapan na diay kini sa tubig sa dagat nga base sa balaod gipanag-iya na sa estado ug di na sa usa ka pribadong tawo maong gikwestyon karon giunsa man nga kini nakalusot ug napalit ug natitulohan pa.

Matud pa ni Opposa angayang mapasabot sa gobernador ug ubang opisyal sa Kapitolyo ang publiko sanglit naglambigit kini og dakong kantidad gikan sa mga magbubuhis sa Sugbo.

Nasayran nga si Gobernador Garcia ug bokal Juan Bolo nagtuloranay na karun ug nagbinasulay kun si kinsa maoy sad-an sa maong transaksyon.

Si Bolo bag-o pang ni-resign pagka-chairman sa Provincial and Municipal Properties human maoy gibasol sa gobernador nga maoy nangusog sa negosasyon aron mapalit sa probinsya ang maong luna ug gani mibakasyon kini karon sa lugar sa iyang asawa sa Dapitan. (BANAT NEWS)