CEBU, Philippines - Gipang-apod kagahapon ni Cebu Governor Gwendolyn Garcia ang 56 ka mga deed of absolute sale sa mga residente sa barangay Lahug nga niokupar sa luna nga gipanag-iya sa lalawigan diha sa maong barangay.
Ang maong mga residente dugay nang panahon nga nagpuyo sa maong mga luna ug ang kadaghanan nangapo nalang samtang nagpuyo sa maong dapit, ang maong mga luna nasakop sa Ordinance 93-1 lot nga gilalisan kaniadto sa dakbayan ug sa lalawigan.
Ang barangay Lahug usa ra sa onse ka mga barangay sa dakbayan sa Sugbu nga nasakop sa 93-1 ordinance, ang ubang mga barangay mao ang barangay Lorega San Miguel, Busay, Apas, Luz, Camputhaw, Mabolo, T. Padilla, Kalunasan , Tejero ug Kasambagan.
Ang maong mga residente nakadawat sa maong dokumento human nila makumpleto sa ilang bayranan sa mga luna nga ilang gitukuran sukad kaniadto pa sa ilang mga pinuy-anan.
Si Delos Santos namahayag atubangan sa maong mga residente nga mismong siya naglibog na karon kung asa gyud ang address sa barangay Lahug sanglit dako na kaayo ang natabang sa lalawigan sa iyang barangay imbes nga gikan sa dakbayan.
Pipila palang ka adlaw pormal nga gibuksan ang gidonar nga bag-ong school building diha sa Barangay Lahug Elementary School nga gigastuhan sa lalawigan.
Si Garcia nagkanayon nga di magdiki-diki pagtabang ang lalawigan sa bisan kinsang mga tawo basta moduol ug magpatabang.
Dunay 4,358 homeowners ang nasakop sa 93-1 ug 1,440 na kanila ang nakabayad sa ilang mga luna. Ang nahibiling wala pa makabayad hatagan sa ilang mga dokumento unya sa mosunod nga mga adlaw. - BANAT NEWS