Mga Cuenco ug higala nagpa-Misa

CEBU, Philippines - Usa ka Santos nga Misa ang gihimo diha sa Alliance of Two Hearts kagahapong adlawa pahinungod sa ika-26 ka tuig nga anibersaryo sa kamatayon ni kanhi senador Benigno “Ninoy” Aquino.

Ang maong misa gipahinungod sa suod nga pamilya sa mga Aquino nga sila si Rep. Antonio Cuenco.

Matud pa ni South District Rep. Antonio Cuenco sa pakighinabi sa Banat News nga lakip sa mitambong mao ang mga barangay officials ug mga tawong nakaila ug nakasaksi sa mga maayong nahimo ni Ninoy sa buhi pa kini.

Si Cuenco nagkanayon nga angayang hinuktukan ug sundon ang mga mithi ni Ninoy aron mahimong malampuson ang nasud.

Butyag usab ni Cuenco nga gawas sa maayong mithi misunod usab si Ninoy sa konstitusyon ug maisugon kaayong mibatok sa diktadorya ug mga pangawkaw nga nahitabo sa kagamhanan niadtong Martial Law.

Si Cuenco ug Ninoy parehong sakop sa Liberal Party kaniadto, si Ninoy senador samtang si Cuenco kongresista.

Samtang sa interbyu sa ABS-CBN Central Visayas kang Cuenco pabor kining ang anak ni Ninoy nga si Benigno “Noynoy” Aquino Jr. modagan sa mas taas nga posisyon karong umaabot nga piniliay , si Noynoy sakop usab sa Liberal Party.

Matud pang Cuenco nga mas maayong si Noynoy mosunod sa mga yatak sa iyang mga ginikanan nga sila Cory ug Benigno Sr. apan kun dili mosugot ang batan-ong Aquino adto kang Manny Villar mosuporta si Cuenco. - BANAT NEWS