CEBU, Philippines - Unom ka mga police nga mag-duty sulod sa 24-oras maoy magbantay sa pagatukoron unyang “police outpost” diha sa gawas nga bahin sa Cebu City Jail nga nahimutang sa barangay Kalunasan ning dakbayan.
Kini maoy paningkamutan ni Sr. Insp. Mario Monilar ang hepe sa Guadalupe Police Station nga mahinayon gyud pag-butang aron makabantay sa mga residente ug ingon man bisan unsang krimen.
Apan giklaro ni Sr. Insp. Monilar sa mga sakop sa media nga ang maong lakang walay kalambigitan sa nahitabong pagpusil-patay kang Jeromy Polistico, niadtong milabay’ng semana nga mao pa gyu’y paggula sa maong prisuhan human makapiyansa uban sa iyang abogado.
Gipasabot niini nga nag-una na kini niyang plano sukad sa iyang paglingkod isip hepe sa Guadalupe Police Station gumikan kay kini maoy giduso ni Konsehal Augusto “Jun” Pe.
Gani sa ilang tigom uban sa mga sakop sa Police Coordinating and Advisory Council (PCAC) ilang gihisgutan ang pagpatuman niini.
Una niini si Supt. Efren Nemeño mibutyag nga ang mga kadagkuan sa Bureau of Jail Management and Penology (BJMP) uban sa mga opisyal sa barangay Guadalupe ug Kalunasan nagtinguha gyud nga mabutangan og police outpost sa kapulisan gawas sa Cebu City Jail.
Kini aron usab kadtong dunay mga kaliwat nga nabilanggo nga mobisita dili usab mabiktima sa krimen niadtong mga dautang elemento atol na sa ilang pag-pauli. - Guam Logroño (BANAT NEWS)