CEBU, Philippines - Samaran ang usa ka babaye human kini pusila samtang nagtan-aw kini og telebisyon sulod sa ilang panimalay sa sitio Lourdes barangay Jagobiao dakbayan sa Mandaue sa milabayng gabii.
Ang biktima mao si Josephine Pepito, 42, residente sa maong dapit samtang ang gitumbok nga namusil mao si Anthony Abasolo, 26, silingan sa biktima.
Sa pasiunang imbestigasyon ni PO2 Ranjie Lopez sa kapolisan sa Station 3 sa MCPO nasayran nga nagtan-aw og TV si Pepito dihang miabot ang suspek ug nangita sa inahan sa biktima.
Sa dihang gitubag ni Pepito nga wala sa ilang panimalay ang inahan kalit nga gipusil sa suspek ang biktima.
Sa tulo ka buto nga nabati sa biktima usa niini ang nakaigo sa iyang tudlo ug swerte nalang nga wala siya maigo sa iyang ubang parte sa kalawasan diin dali kini gipatambalan sa Mactan Doctors hospital.
Samtang si Abasolo dali nga nakabiya sa maong dapit ug nagtagotago.
Matud pa ni PO2 Lopez sa dugang nilang imbestigasyon wala masayod si Pepito kung unsay ilang atraso sa iyang inahan ngadto kang Abasolo nga masuk-anon kini nga nangita sa iyang inahan. - Bong Soriano (BANAT NEWS)