Paglabay'g granada may labot diay sa gugma

CEBU, Philippines - Gumikan sa gugma, usa ka lalaki ang gikatahong nanugo og hired killer aron labayon og granada ang panimalay sa iyahang karelasyon nga niresulta sa pagka-angol sa amahan sa babaye.

Nahitabo ang pagpanglabay’g granada niadtong Miyerkules sa gabii diha sa eskina sa Tres de Abril St. ug F. Llamas St., barangay Punta Princesa ning dakbayan apan nadakpan gilayon ang suspek nga si Edwin Florida, 41 taga sitio Grass Ave., Basak-Pardo nga giingong usa ka hired killer.

Ang director sa kapulisan sa dakbayan sa Sugbu Sr. Supt. Patrocinio Comendador nagkanayon nga base sa imbestigasyon giingong gisugo si Florida sa laing nadakpan nga si Freddie Estoesta, 50, taga Basak-Pardo nga gikatahong may relasyon sa anak nga babaye sa naangol nga si Mamerto Cuyag, 56, si Cuyag naigo sa tuong tiil ug paa.

Matud pa ni Comendador nasuko si Estoesta sa pamilya sa iyang uyab tungod kay supak sila sa ilang relasyon ug gani gipabuwag silang duha.

Nakuha ang mga cellphone sa duha nga giingong naghisgut sa plano sa paglabay sa granada, si Florida nagdala og codename nga “tiger” samtang si Estoesta may codename nga “shark.”

Gikatahong wala masayod si Estoesta nga nadakpan dayon si Florida sa Punta Prinsesa police ug dihang iyang gi-text kun nadayon ang ilang plano gitubayan kini nila ni Supt. Pablo Labra.

Ang duha nagsabot nga mag-abot sa South Road Property hinungdan nga giadto kini nila ni Labra ug nadakpan si Estoesta, gisusi karon ni Comendador ang impormasyong “demolition expert” kon bomb expert kaniadto sa Philippine Navy si Estoesta. - BANAT NEWS