P1M nga MJ gidauban

CEBU, Philippines - Dul-an sa usa ka milyon ka pesos nga kantidad sa 9,622 ka punoan sa marijuana nga nasakmit sa kapulisan sa bukirang barangay sa dakbayan sa Sugbu gidauban kagahapong adlawa diha sa atubangang bahin sa Sugbu Homes sa South Road Property.

Ang pagdaob sa maong marijuana gipanguluhan mismo ni Sr. Supt. Patrocinio Comendador, director sa kapulisan sa dakbayan uban sa ubang mga opisyal sa dakbayan sa Sugbu.

Si Comendador nagkanayon nga ang maong mga marijuana nasakmit sa mga sakop sa Cebu City Mobile Group (CMG) uban sa mga opisyal sa mga bukirang barangay ug mga tanod sa ilang 23 ka mga operation sukad niadtong Pebrero hangtud ning buwana nga miresulta usab sa pagkadakop sa usa ka planter niini.

Gikatakdang pasidunggan karong Lunes sila si Supt. Eliseo Castronuevo, ang hepe sa CCMG ug mga sakop niini, lakip na ang mga barangay opisyal ug barangay tanod sa barangay nga miabag sa kapulisan.

Ang kapulisan mibutyag nga problema gihapon nila ang mga marijuana diha sa barangay Tabunan, Pung-ol Sibugay, Sudlon, Tagbao, Sudlon l, ug Sudlon II apan mapasalamaton sila nga duna gihapoy mga residenteng nagpakabana pagtug-an. - BANAT NEWS