Coal ash dili makadaot

CEBU, Philippines - Gipamatud-an ni Mayor Valdemar Chiong sa lungsod sa Naga nga dili makadaot sa panglawas ang coal ash nga gikan sa Salcon sa lungsod sa Naga nga maoy giplanohang itambak sa kagamhanan sa lalawigan sa Sugbu ngadto sa napalit nga 25 ka hektaryang lote didto sa barangay Tinaan, lungsod sa Naga.

Si Mayor Chiong nagkanayon nga dili makadaot ang clay ash o coal ash nga gitambak sa ilang pag-reclaim sa ilang pantalan nga nahimutang sa luyo nga bahin sa ilang munisipyo.

Gani may gipakita siyang mga test result gikan sa Environment Management Bureau sa Department of Environment and Natural Resources nga gipirmahan sa OIC regional director niadtong tuig 2006.

Matud pa ni Chiong nga susamang coal ash nga gigamit nila sa pag-reclaim sa pantalan mao usab ang itambak unya sa lote sa Kapitolyo sa Tinaan alang sa katukoran sa usa ka International Port.

Iya usab nga gitataw nga sayop ang pamahayag sa mga environmental lawyers pagtumbok nga ang coal dili haum nga itambak sa usa ka hunasan o kaha kadagatan tungod kay ang EMB sa DENR mirekomendar man kining haum isip filling materials.

Samtang gihulagway ni Chiong nga usa ka dakong binuang ang mga pasangil ni Engr. Crisologo Saavedra nga nakakuwarta usab siya sa pagkahalin sa lote sa mga Balili sa Tinaan, Naga.

Matud pa sa mayor nga nagpataka lamang og buka sa iyang baba si Saavedra tungod kay wala siya’y kalibutan sa pagpalit sa Kapitolyo sa lote sa pamilyang Balili ug igo lamang siya giimbitar ni Gobernador Gwendolyn Garcia dihang gibayran na ang maong luna. - Chester Abadilla (BANAT NEWS)