CEBU, Philippines - Nahurot sa pagka-putol ang lima ka kuyamoy sa walang bahin sa kamot sa usa ka 71-anyos nga lola human gikaon sa kadena ug sprocket sa habal-habal niadtong Martes sa hapon didto sa barangay Poblacion lungsod sa Santander.
Nawad-an sa lima ka kuyamoy giila sa kapolisan nga si Eugenia Culanag, 71, biyuda taga barangay Libtong pagdala sa tambalanan human sa insidente ug gibalhin sa tambalanan dinhi sa dakbayan sa Sugbu.
Si PO1 Noel Estender, desk officer sa kapolisan sa lungsod sa Santander nga gikahinabi sa Banat News nagkanayon nga si Culanag gipasakay sa drayber sa habal-habal nga si Jonathan Juguilon, 32, taga barangay Candamiang.
Matud pa ni PO1 Estender nga naluoy si Juguilon ni Culanag nga permaninting makit-an niini nga maglakaw lang sa nahisgutang dapit ug gani nianang pagka Martes sa buntag iya usab kini gipasakay.
Apan sa pagkahapon sa dihang mopauli na unta siya aron sa pagpahuway sa pagpamasahero iya na usab nga naagian ang tiguwang hinungdan nga iya nalang gipasakay tungod kay mas nauna ang barangay niini kay sa iyang pauliang barangay.
Sumala pa nga samtang nagdagan ang habal-habal ang face towel sa maong tiguwang kalit lang nga napalid sa hangin ug didto kini mitugpa sa kadena sa motor ug gikaon sa sprocket.
Apan gikatahong gisayangan sa face towel, gibira kini sa tiguwang hinungdan nga ang iyang walang kamot gilamoy sa kadena ingon man sprocket ug nangaputol.
Dungan usab sa pagkatumba sa motorsiklo. – BANAT NEWS