Konseho misalig pa kang Supt. Biñas

CEBU, Philippines - Bisan pa sa kontrobersiya nga giatubang karon sa kapolisan sa dakbayan sa Talisay tungod sa giingong pagkalambigit sa tulo ka polis kabahin sa pagpangilkil, ang konseho sa siyudad daku gihapon ang pagsalig ngadto kang Supt. Henry Biñas, hepe sa Talisay City Police Station.

Si Konsehal Arturo Bas, tsirman sa komitiba kahapsay ug kalinaw sa konseho sa siyudad nagkanayon nga maghuwat sila sa resulta sa imbestigasyon sa National Bureau of Investigation (NBI) kabahin sa maong insidente ug kung mopadayon og pasaka og kiha ang biktima una sila mogama og mga lakang.

 Apan matud niini nga dili sila makatuong dunay kalabutan sa maong hitabo si Biñas, kini may labot sa migawas nga report nga giingong gigamit sa tulo ka polis ang pangalan sa ilang opisyal.

Ang maong mga polis mao sila si PO3 Eric Enad, PO2 Roy Sarsaba ug PO2 Keyserling Martin Gorosin III.

Si Bas midugang nga normal sa mga namuhat og ilegal ilabi na ang kabahin sa ginadiling drugas nga mamasangil ngadto sa kapolisan tungod sa ilang kasuko.

Giawhag niini ang kapolisan nga padayonon ug hugtan pa gyud ang ilang operasyon batok sa mga ilegal nga drugas sa siyudad aron masumpo kini.

Si Bas midugang nga sa pagpanghinaot nga ang mga residente unta diha sa barangay Tanke ang dili unta motabon sa mga namaligya og ginadiling drugas diha sa ilang lugar hinuon unta motabang sa kapolisan aron mahunong na ang maong ilegal nga kalihukan. - Brenda Batuto (BANAT NEWS)