Kapitolyo naglikay sa plunder - Tomas

CEBU, Philippines - Nagduda si   Mayor Tomas Osmeña nga naglikay nga makasuhan og plunder ang mga opisyal sa Kapitolyo sa pag-angkon niining 38 porsiyento lang sa yuta ug dili 80 porsiyento ang nalubog sa tubig sa napalit niining dul-an sa P100 milyones nga Balili property diha sa siyudad sa Naga.

Kumbinsido si Osmeña sa gipakitang mapa ni Engineer Fortunato Lazaro nga lima ka ektarya lang ang dry land sa 25 ka ektaryang luna nga napalit sa Kapitolyo.

Ang nahisgutang geodetic engineer personal nga nakasusi sa Balili property pipila ka tuig na ang nakalabay dihang usa usab ka kompanya ang gusto nga mopalit sa maong luna.

Ang mayor nagkanayon nga angayang 80% usab sa nabayad sa kagamhanang probinsyal ang angayang bawion, kini nagpasabot nga dul-an P80 milyones pa ang bawionong salapi.

Nagtuo si Osmeña nga gilikayan sa kagamhanang probinsyal nga mapasakaan og kasong plunder hinungdan nga ubos sa P50 milyones lang ang gustong bakwion niini.

“Eighty percent of 100 million is 80 million that brings in to the level of plunder and there’s no bail, so, by keeping it below 50 million it’s bailable. So, 38 million is a good number maybe that’s damage control,” sumala ni Osmeña.

Subay niini nanawagan ang mayor ngadto sa Ombudsman Visayas nga pakighinabian gyud ang surveyor (Lazaro).

“I hope the Ombudsman will be able to talk to the surveyor who is an impartial surveyor because he actually survey the area before, and he said that only 5 hectares is dryland out of the 25 hectares,” nagkanayon si Osmeña.

Una nang giangkon ni Gobernador Gwendolyn Garcia ang kasaypanan sa pagpalit sa Balili property ug nangayo’g pasaylo sa maong isyu. – BANAT NEWS