CENTCOM motukod og laing grupo

CEBU, Philippines - Ang Central Command (Centcom) nangandam aron sa pagtukod og duha ka mga grupo alang sa seguridad nga tawgon nga Barangay Security System ug Town Security System sa mga lalawigan sa Sugbu ug Bohol.

Kini maoy gipahibalo ni Lt. Gen. Isagani Cachuela ang commanding general sa CentCom human siya makigtagbo sa kadagkuan sa Police Regional Office (PRO-7) niadtong miaging Sabado bahin sa seguridad sa Central Visayas.

Matud pa ni Cachuela nga ang Probinsya sa Sugbu ug Bohol sa pagkakaron wala nay problema bahin sa insurhensya hinungdan nga makig-alayon nalang sila sa kapolisan ug sa mga opisyal sa barangay ug kalungsoran kalabot sa maong lakang. Gipasabot ni Cachuela nga kining Barangay Security System ug Town Security System mga tawo kining pilion nila sa matag barangay nga dili sakop sa eksistido na nga barangay intelligence network (BIN) ug mga tanod ug ipaubos gihapon kini sa hustong screening ug pagbansay sa panahon nga madawat sila.

Midugang si Cachuela nga sa pagkakaron suliran pa gihapon ang mga rebelde sa Negros ug ubang lugar sa Visayas ug gipaabot nila nga mobalik kini sa sabakan sa gobiyerno sa dili madugay.

Samtang subay niini ang 78th Infantry Battalion nga nagbasi sa lungsod sa Balamban, ibalhin na ngadto sa lungsod sa Tuburan aron maatiman pag-ayo ang kahimtang sa kalinaw ug kahusay sa maong mga lugar. - Guam P. Logroño (BANAT NEWS)