Arcenas Estate way development permit

CEBU, Philippines - Patubagon ni Cebu City Mayor Tomas Osmeña ang Arcenas Estate nga developer ingon man maoy kontraktor sa Casa Rosita Homes diha sa barangay Tisa ning siyudad sa kadaut nga ilang nahatag mugna sa pagkatumba sa paril niini nga nidat-og sa usa ka balay ug mikalas og kinabuhi.

Kini tungod kay ang Arcenas Estate giingong walay development permit alang sa site development ug walay business permit usab ang Undaloc construction sa dakbayan.

Tungod niini, gusto ni Osmeña nga ipabarug og balik sa developer ingon man sa kontraktor ang panimalay nga naguba ingon man ang ubang naapektahan sa hitabo.

Usa ka Wilma Parba ang namatay human madat-ugi ang ilang balay niadtong adlaw’ng Domingo, nasayran nga mihatag na og P20 mil nga financial assistance ang Arcenas Estate ngadto sa nagbangutang pamilya.   

Una nang ni-issue og cease and desist order ang kagamhanan sa dakbayan pagpahunong sa site development sa Casa Rosita, apan kagahapong adlawa, girekomendar sa City Treasurer’s Office nga pasirad-an ang buhatan sa Undaloc Construction diha sa barangay Labangon.

Kini human masuta ni City Treasurer Ofelia Oliva nga napakyas paglukat og mayor’s business permit ang nahisgutang construction firm.

“I have to make it clear to all contractors in the City, you do something like this, you are going to get kicked from this office,” sumala ni Osmeña. - Elly Bolonos (BANAT NEWS)