CEBU, Philippines - Tulo ka mga giingong sakop sa Talisay City Police Station ang gireklamong nangilkil ug gisuwayan og dakop sa entrapment operation sa mga sakop sa National Bureau of Investigation-7 pipila lang ka metros gikan sa ilang police station apan nakaikyas kagahapon sa hapon.
Usa ka uyoan sa usa ka giingong drug personality sa barangay Tangke Talisay ang midangop sa NBI-7 ug mireklamong gipangayoan sila og salapi nila ni PO2 Ropy Sarsaba, PO3 Eric Enad ug PO3 Martin Corosin III.
Ang tulo gikatahong sakay sa ilang police patrol car niadtong higayuna aron pakigtagboan ang reklamanteng si Elvincito Baguio sa gymnasium duol sa karaang Talisay City Hall sa Talisay.
Giingong sa maong dapit kuhaon sa tulo ang gipangayo nilang P50 mil kang Baguio bugti sa pag-downgrade sa kasong ilang ipasaka batok sa pag-umangkon niining si Maridel Obrero nga ilang nadakpan.
Si Obrero nadakpan niadtong milabay'ng adlaw'ng Biyernes sa mga sakop sa Talisay City Police Station atol sa gilusad nga saturation drive sa maong dapit.
Sumala pa ni Baguio si Sarsaba mao ang misulti kaniyang ila lang pasakaan og kasong possession of illegal drugs ug dili pushing si Obrero kun mohatag sila og P100,000 apan kini naus-usan ngadto sa P50 mil.
Sayo kagahapon sa buntag, gikatahong gitawgan siya pag-usab ni Sarsaba ug midemanda kini sa P50 mil hinungdan nga midangop siya sa NBI-7.
Gumikan niini ang mga sakop sa NBI-7 pinanguluhan ni Atty. Bernard dela Cruz miandam dayon sa ilang operasyon pagsikop sa tulo ginamit ang marked money ug ang P30 mil nga ihatag ngadto sa mga polis.
Apan gikatahong pipila ka gutlo una pa ang aktwal nga pagtunol sa kwarta diha sa gymnasium gimandoan ni Sarsaba si Baguio nga adto sila mag-abot sa plaza nga 20 metros gikan sa orihinal nga gikasabutang dapit.
Ang kalit nga pag-usab sa gikasabutang lugar nakapawani sa mga nag-atang na daang mga operatiba sa NBI diha sa palibot sa gymnasium hinungdan nga nawagtang sa ilang panan-aw si Baguio.
Matud pang Baguio diha sa plaza miabot ang tulo nga sakay sa patrol car ug daling mimando kang Baguio nga pasakyon hinungdan nga nawala og kadiyot sa panan-aw sa mga operatiba sa NBI si Baguio.
Sa sulod sa maong sakyanan sumala pa ni Baguio gipangitaan siya ni Sarsaba sa maong salapi hinungdan nga iyang gitunol ang P30 mil ug kini gipaihap ni Sarsaba kang Enad.
Si Baguio mialegar nga gipangutana pa siya sa tulo kun nganong P30 mil ra ang kwarta maong iyaha silang gitug-anan nga mao ra kini ang gihatag kaniya.
Human niini gikatahong gimandoan ni Sarsaba si Baguio pagkanaog sa patrol car nga naatol usab nga nasigpatan kini sa mga sakop sa NBI, dihang migukod ang mga operatiba nawani na usab sila tungod sa pagsutoy sa maong patrol car.
Ang grupo ni Atty. Dela Cruz milahos nalang sa tupad nga police station ug didto ilahang nasigpatan ang patrol car nga may plakang SHM-926 kansang drayber gikatahong daling midagan pasulod sa police station maong gigukod kini sa mga operatiba apan wala nila kini makit-i sa maong buhatan.
Gisuwayan pagpangayo og tabang sa NBI si Supt. Henry Biñas ang hepe sa maong mga polis nga ipresentar ang iyang mga sakop nga nalambigit sa maong reklamo.
Si Biñas gikatahong mipasalig nga iyang ipa-report ang tulo sa provincial hedquarters. Iyaha usab gitugutan ang NBI nga patan-awon sa personal profiles sa maong mga polis ug sila pulos positibong giila pinaagi sa ilang mga litrato ni Baguio.
Wala usab did-i ni Biñas ang mga operatiba nga susihon ang mga lawak sa iyang buhatan pagpangita sa drayber apan wala makit-i ang maong polis.
Sumala pa ni Biñas nga iyahang imbestigahon ang iyang mga sakop kabahin sa hitabo.
Bisan paman sa pagkaikyas sa tulo gikatakda gihapon silang pasakaan og kasong kriminal ug administratiba sa NBI ug mga reklamante. (Uban sa report ni Edwin Ian Melecio) BANAT NEWS)