Armas sa police auxiliary gipaboran

CEBU, Philippines - Pabor si Cebu City ABC president Eugenio Faelnar sa lakang sa kapulisan nga padad-on na og armas ang mga police auxiliary subay sa plano sa Oplan Damayan program sa Philippine National Police kon PNP.

Sa maong bag-ong programa, pilion ug hashasan og maayo ang mga sakop sa Police Auxiliary Group ug ipailawom sa training sa Special Action Force (SAF) sa PNP ug ang pipila isyuhan gyud og armas gikan sa PNP.

Matud pa ni Faelnar nga siya kaniadto pa nagsugyot ngadto sa kapulisan nga tugutang makadala og armas partikular na ang mga barangay tanod.

Kini human usab sa mga hitabo nga naglambigit og mga tanod nga gipangkulata ug gipamusil nga walay kahigayunan nga makabawos sa responsable.

Giangkon hinuon sa ABC president nga nanginahanglan pa og tukmang pagbansay-bansay ang mga police auxiliary ilabi na sa gun handling.

Una nang gipadayag ni Cebu City Police Office Director Senior Superintendent Patrocinio Comendador nga duna nay bag-ong guidelines niini ang PNP. (Elly Bolonos uban sa report ni Guam Logroño)   (BANAT NEWS)