Bokal Juan Bolo mo-resign sa komitiba: Way naka-komesyon sa deal - Pamilya Balili

CEBU, Philippines - Mipagawas na og opisyal nga pamahayag ang pamilyang Balili nga naglimpyo kang bokal Juan Bolo gikan sa mga pasangil nga naka-komisyon sa transaksyon pagpalit sa probinsya sa Sugbo sa Balili Property nga nahimutang sa Tinaan, Naga sa kantidad nga P98 milyones bisan pa og 80 porsiyento niini naglubog sa tubig.

Garcia, 13 ka bokal gikasuhan

Tungod sa pagpangayo og pasaylo ni Governor Gwendolyn Garcia nga may kasaypanan siyang nahimo pagpalit sa lote sa pamilyang Balili sa barangay Tinaan lungsod sa Naga, ang mga environmental lawyers mipakasa og kaso batok sa gobernador ug opisyales sa lalawigan.

Sila si environmental lawyer, Atty. Benjamin Cabrido Jr. ug Atty. Gloria Estenzo-Ramos mipasaka kagahapon sa hapon og kasong Anti-Red Tap Act kon RA 9485 ug Code of Conduct for Public Officials and Employees kon RA 6713.

Ang gipasakaan og kaso mao sila si Garcia, Vice Gov. Gregorio Sanchez ug ang trese ka mga sakop sa Hunta Probinsyal gawas lang kang Bokal Agnes Magpale.

Matud pa ni Cabrido nga siya maoy moatiman sa civil case kay iyang korte ang environmental laws, samtang sa criminal ug administratiba may laing grupo sa mga abogado ang miboluntaryong mitanyag og tabang sa maong kaso.

Gipangayo sa mga abogado nga masuspenso og 16 ka adlaw ang maong mga gikihang opisyales sa lalawigan gumikan sa pagdumili nila paghatag og kopya sa mga dokumento sa transaksyon sa Balili deal.

 Ang maong kaso mag-sentro unya sa kontrobersiya sa loteng napalit sa Kapitolyo sa lungsod sa Naga nga mitumaw nga 80 porsiyento diay niini ang anaa sa kadagatan ug kabakhawan.

Si Atty. Cabrido mipasabot nga sa balaod ang “admission of guilt” mitigating ra kun nahimo gyud ang krimen, makapaubos lamang kini siya sa silot.

Gipasabot ni Cabrido nga mahanaw lamang ang maong krimen kun pasayluon kini sa pribadong complainant apan sa kaso sa gobernadora sa lalawigan sa Sugbu ang estado maoy kontra niini. Miingon si Atty. Cabrido nga silang mga environmental lawyers walay personal nga kalagot sa gobernador bisan pa man og gisigehan sila og insulto niini sanglit mahimo silang makapasaylo niini.

Apan niining maong kaso, ang katawhan Sugbuanon maoy mahimong kihante batok sa gobernadora busa dili siya mahimong makalingkawas niini.

Samtang posibleng wala na say makuha pang laing property ang Kapitolyo gikan sa pamilyang Balili nga ikatapak sa kapin sa 9 ka ektaryang luna nga naglubog na sa tubig dagat ug kabakhawan.

Kini tungod giingong mas daghan pang mga luna nga gipanag-iya ni Engr. Luis Balili nga na-converted na ngadto sa kagamhanan tungod kay kini naabtan na usab sa tubig dagat.

Matud pa ni Cabrido nga may nakuha siyang dugang dokumento nga   nagpakitang ubay-ubay pang land conversion ang nahimo sa DENR sa propiyedad ni Engr. Luis Balili sa tuig 1990 pa.

“Kay ang akoang dugang documents on hand, mas lapad ug mas daghan pa gyud ang reversion. In fact adunay nag-una niadtong 2002, as early sa 1990s duna na pud mga properties nga na reverted. So asa pa man sila mangita? Because these are fraudulently titled,” matud pa ni Atty. Cabrido. (Chester Abadilla)   (BANAT NEWS)