CEBU, Philippines - Nagpadayon ang manhunt operation sa kapulisan sa batan-ong suspek nga miunay og pusil patay sa iyang kaugalingong uyoan sa sitio Tabok barangay Hagnaya lungsod sa Carmen niadtong Sabado sa alas 4:30 sa hapon.
Matud ni SPO1 Danilo Laurente sentro sa gimonitor karun nga lugar mao ang siyudad sa Danao diin magpuyo ang suspek nga si Timoteo Caputol, molupyo sa barangay Santican siyudad sa Danao.
Si Caputol maoy gitumbok nga mipusil patay sa biktima nga iyahang uyoan nga si Expedito Caputol, 49, nagpuyo sa maong dapit.
Subay sa inisyal nga imbestigasiyon sa kapulisan karaan nga kasungian sa uyoan ug pag-umangkon nga suspek ang hinungdan sa krimen ug gihikay na ang kasong ipasaka batok sa suspek karung buntag.
Ang biktima nga si Expedito gisulong sa iyang pag-umangkon sa iyang pinuy-anan ug dihang nagkomprontase kalit lang kining gidul-itan og pusil sentro sa dughan ug patay diha-diha.
Ang suspek daling nisibat human sa hitabo paingon sa siyudad sa Danao ug gituohan sa kapulisan nga anaa pa karun sa maong lugar nagtago-tago ug wala pa makagawas pahilayo sa Sugbo. (Darrel Carumba)