Kanhi rebelde gihatag'g tag P30 mil

CEBU, Philippines - Mga kanhi sakop sa rebeldeng New Peoples Army (NPA) nga naglihok dinhi sa lalawigan kinsa namalik na sa sabakan sa balaod gipanghatagan og financial ug livelihood assistance sa kagamhanan sa probinsya sa Sugbu.

Nangulo sa pagtunol sa financial assistance nga P30 mil matag usa sa 35 ka mga kanhi rebelde mao sila si Gobernador Gwendolyn Garcia ug Bise Gobernador Gregorio Sanchez, PRO-7 Chief Supt. Lani-O Neres; Central Command Commanding General Lt. Gen. Isagani Cachuela.

Lakip sa mitambong mao sila si Lt. Col. Raymund Bañares sa 78th IB, Major Gen. Arthur Tabaquero sa 8th ID nga nagbase sa Samar, mga provincial Board Members ug mga mayor ug representante sa mga lungsod, Asturias, Tuburan, Danao, Catmon, Danao, Compostela ug Balamban.

Ang 35 ka mga kanhi sakop sa NPA nisurender gikan niadtong Marso 28 hangtud Hunyo 9 niining tuiga ug apil sa ilang gitahan ang ilang tagsa-tagsa ka tag-as nga kalibre sa armas nga maoy ilang gigamit kaniadto samtang aktibo pa sila sa kalihukan sa bukid.

Si Sanchez kinsa maoy mihatag sa unang mensahe atol sa maong kalihokan diha sa Capitol social hall mipadayag sa iyang dakong paghigugma ngadto sa mga kanhi kaaway sa gobiyerno nga nahibalik na sa sabakan sa balaod ug pinaagi niining maong paghigugma, matud ni Sanhez magpadayon ang pagpanghatag og financial ug livelihood assistance kanila.

Sa iyang bahin si Chief Supt. Nerez nihangop sa mga kanhi rebelde ug mipadayag sa kaandam sa PNP pagtabang niadtong gustong mobalik sa sabakan sa balaod.

Si Lt. Gen. Cachuela nipadayag usab nga kundili dili pa hugot ang suporta sa gobernador ug bise gobernador dili usab sila magmalampuson sa ilang kampanya sa insurhensya. (Rey Pasaporte)