British national gitulis nagtibi

CEBU, Philippines - Nagtibi ang usa ka British National nga misumbong sa kapolisan sa lungsod sa Argao human kini tulisa sa duha ka wala hiilhing tulisan didto sa Argao Public Market kagahapon.

Ang biktima mao si Graham Smith, 50, usa ka British National, nga temporayong nagpuyo sa Sitio Media sa nahisgutang barangay.

Si PO1 Bernie Lao sa Argao Police Station mibutyag sa Banat News nga si Smith nakuhaan sa iyang cash nga P4 mil, relo de pulso nga balor og 2 pounds, 160 pounds nga cellphone, 20 pounds cash, ug uban pa. Matud pa ni PO1 Lao, nga si Smith kuyog sa iyang uyab nga si Rotchel Gaelon nga namalit sa sulod sa merkado dihang kalit lang mitumaw ang duha ka tawong nagtaptap sa ilang dagway ug mipahibawo nga tulis. Ang kasinaw sa armas de fuego nga gipunting ngadto sa langyaw maoy nakapugos sa biktima sa paghatag nalang nga malinawon sa iyang mga butang ngadto sa mga tulisan.

Padayon pang gipanid-an karon sa kapolisan ang maong mga tulisan. -  BANAT NEWS